ਧਰਮਸ਼ਾਲਾ: ਕਾਂਗੜਾ ਵੈਲੀ ਕਾਰਨੀਵਲ 2025 ਦੀ ਆਖਰੀ ਸੱਭਿਆਚਾਰਕ ਸ਼ਾਮ ਯਾਦਗਾਰੀ ਹੋ ਨਿਬੜੀ, ਜਦੋਂ ਮਸ਼ਹੂਰ ਪੰਜਾਬੀ ਗਾਇਕ ਗੈਰੀ ਸੰਧੂਅਤੇ ਪਹਾੜੀ ਗਾਇਕ ਇਸ਼ਾਂਤ ਭਾਰਦਵਾਜ ਦੀਆਂ ਪੇਸ਼ਕਾਰੀਆਂ ਨੇ ਪੂਰੇ ਪੰਡਾਲ ਨੂੰ ਝੂਮਣ ਲਾ ਦਿੱਤਾ। ਅੱਠ ਦਿਨਾਂ ਤੱਕ ਚੱਲਿਆ ਇਹ ਸ਼ਾਨਦਾਰ ਮਹਾਉਤਸਵ ਸਥਾਨਕ ਲੋਕ-ਸੰਸਕ੍ਰਿਤੀ ਅਤੇ ਵਿਰਾਸਤ ਨੂੰ ਸਮਰਪਿਤ ‘ਲੋਕਲ ਕਾਂਗੜੀ ਅਤੇ ਗਡਿਆਲੀ ਨਾਈਟ’ ਦੇ ਨਾਲ ਉਤਸ਼ਾਹਪੂਰਵਕ ਸਮਾਪਤ ਹੋਇਆ।
ਗੈਰੀ ਸੰਧੂ ਦੇ ਹਿੱਟ ਗੀਤਾਂ ‘ਤੇ ਝੂਮੇ ਨੌਜਵਾਨ
ਸਮਾਪਤੀ ਸਮਾਰੋਹ ਦੀ ਮੁੱਖ ਖਿੱਚ ਪੰਜਾਬੀ ਸਟਾਰ ਗੈਰੀ ਸੰਧੂ ਰਹੇ। ਜਿਵੇਂ ਹੀ ਉਹਨਾਂ ਨੇ ਆਪਣੇ ਸੁਪਰਹਿੱਟ ਗੀਤ ‘ਦੋ ਗੱਲਾਂ ਕਰੀਏ ਪਿਆਰ ਦੀਆਂ’, ‘ਨੈਣ’, ‘ਇਲੀਗਲ ਵੈਪਨ’, ‘ਹਾਂ ਕਰ ਦੇ’ ਅਤੇ ‘ਡੋਰੀਆਂ’ ਗਾਉਣੇ ਸ਼ੁਰੂ ਕੀਤੇ ਤਾਂ ਨੌਜਵਾਨਾਂ ਤੋਂ ਲੈ ਕੇ ਬਜ਼ੁਰਗਾਂ ਤੱਕ ਹਰ ਕੋਈ ਨੱਚਣ ਲਈ ਮਜਬੂਰ ਹੋ ਗਿਆ। ਦਰਸ਼ਕਾਂ ਨੇ ਮੋਬਾਈਲ ਦੀਆਂ ਫਲੈਸ਼ਲਾਈਟਾਂ ਜਗਾ ਕੇ ਅਤੇ ਗੀਤਾਂ ਨਾਲ ਸੁਰ ਮਿਲਾ ਕੇ ਮਾਹੌਲ ਨੂੰ ਬੇਹੱਦ ਖ਼ੂਬਸੂਰਤ ਬਣਾ ਦਿੱਤਾ। ਇਸ ਦੇ ਨਾਲ ਹੀ ਪਹਾੜੀ ਗਾਇਕ ਇਸ਼ਾਂਤ ਭਾਰਦਵਾਜ ਨੇ ਵੀ ਆਪਣੀ ਗਾਇਕੀ ਨਾਲ ਖੂਬ ਰੰਗ ਬੰਨ੍ਹਿਆ।
ਵਿਧਾਨ ਸਭਾ ਸਪੀਕਰ ਕੁਲਦੀਪ ਪਠਾਨੀਆ ਨੇ ਕੀਤੀ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ
ਇਸ ਖਾਸ ਸ਼ਾਮ ਵਿੱਚ ਹਿਮਾਚਲ ਪ੍ਰਦੇਸ਼ ਵਿਧਾਨ ਸਭਾ ਦੇ ਸਪੀਕਰ ਕੁਲਦੀਪ ਪਠਾਨੀਆ ਨੇ ਮੁੱਖ ਮਹਿਮਾਨ ਵਜੋਂ ਸ਼ਿਰਕਤ ਕੀਤੀ। ਆਪਣੇ ਸੰਬੋਧਨ ਦੌਰਾਨ ਉਨ੍ਹਾਂ ਕਿਹਾ ਕਿ ਕਾਂਗੜਾ ਵੈਲੀ ਕਾਰਨੀਵਲ ਵਰਗੇ ਆਯੋਜਨ ਹਿਮਾਚਲ ਦੀ ਸੱਭਿਆਚਾਰਕ ਪਛਾਣ ਨੂੰ ਕੌਮਾਂਤਰੀ ਪੱਧਰ ‘ਤੇ ਉਭਾਰਨ ਵਿੱਚ ਸਹਾਈ ਹੋਣਗੇ। ਉਨ੍ਹਾਂ ਇਸ ਨੂੰ ‘ਵਿੰਟਰ ਟੂਰਿਜ਼ਮ’ (ਸਰਦ ਰੁੱਤ ਸੈਰ-ਸਪਾਟਾ) ਨੂੰ ਹੁਲਾਰਾ ਦੇਣ ਲਈ ਇੱਕ ਨਿਵੇਕਲੀ ਪਹਿਲ ਦੱਸਿਆ।
ਸੱਭਿਆਚਾਰਕ ਵੰਨਗੀਆਂ ਅਤੇ ਮੁਕਾਬਲੇ ਰਹੇ ਖਿੱਚ ਦਾ ਕੇਂਦਰ
ਕਾਰਨੀਵਲ ਦੌਰਾਨ ਸਿਰਫ਼ ਗਾਇਕੀ ਹੀ ਨਹੀਂ, ਸਗੋਂ ਕਾਂਗੜੀ ਅਤੇ ਗਡਿਆਲੀ ਲੋਕ ਨਾਚਾਂ ਨੇ ਵੀ ਸਭ ਦਾ ਮਨ ਮੋਹ ਲਿਆ। ਪ੍ਰੋਗਰਾਮ ਵਿੱਚ ਨਿਸ਼ਾ ਪੰਡਿਤ, ਸੰਜੀਵ ਦੀਕਸ਼ਿਤ, ਹਿਮਾਂਸ਼ੀ ਅਤੇ ਨਿਕੇਸ਼ ਬੜਜਾਤਿਆ ਨੇ ਵੀ ਆਪਣੀਆਂ ਪੇਸ਼ਕਾਰੀਆਂ ਦਿੱਤੀਆਂ। ਇਸ ਤੋਂ ਇਲਾਵਾ ਮਿਸ ਅਤੇ ਮਿਸਿਜ਼ ਕਾਂਗੜਾ ਵੈਲੀ ਕਾਰਨੀਵਲ ਇਸ ਮੁਕਾਬਲੇ ਦੇ ਫਾਈਨਲ ਨੇ ਪ੍ਰੋਗਰਾਮ ਵਿੱਚ ਗਲੈਮਰ ਦਾ ਤੜਕਾ ਲਾਇਆ। ਸਮਾਪਤੀ ਦੇ ਮੌਕੇ ‘ਤੇ ਕੀਤੇ ਗਏ ਸ਼ਾਨਦਾਰ ‘ਕਰੈਕਰ ਸ਼ੋਅ’ ਨੇ ਅਸਮਾਨ ਨੂੰ ਰੰਗਾਂ ਨਾਲ ਭਰ ਦਿੱਤਾ।
ਹੋਰ ਖਬਰਾਂ ਪੜ੍ਹਨ ਲਈ ਇੱਥੇ ਕਰੋ ਕਲਿੱਕ : https://livingindianews.co.in/hrithik-roshan-shares-romantic-pictures-of-himself-dancing-with-saba-azad/
ਖ਼ਬਰਾਂ ਲਈ ਲਿਵਿੰਗ ਇੰਡੀਆ ਨਿਊਜ਼ 24/7 ਲਾਈਵ ਨਾਲ ਜੁੜੇ ਰਹੋ