'ਪਤੀ-ਪਤਨੀ ਰੈਸਟੋਰੈਂਟ 'ਚ ਹੁਣ ਇਕੱਠੇ ਬੈਠ ਨਹੀਂ ਖਾ ਸਕਣਗੇ ਖਾਣਾ', ਤਾਲਿਬਾਨ ਦਾ ਨਵਾਂ ਫਰਮਾਨ

ਕਾਬੁਲ- ਤਾਲਿਬਾਨ ਦੇ ਸੱਤਾ 'ਤੇ ਕਾਬਜ਼ ਹੋਣ ਤੋਂ ਬਾਅਦ ਅਫਗਾਨਿਸਤਾਨ ਦੀ ਤਸਵੀਰ ਬਦਲ ਗਈ ਹੈ। ਸਾਰੀਆਂ ਪਾਬੰਦੀਆਂ ਦਾ ਸਾਹਮਣਾ ਕਰ ਰਹੀਆਂ ਔਰਤਾਂ ਦੇ ਰੈਸਟੋਰੈਂਟਾਂ 'ਚ ਜਾਣ 'ਤੇ ਵੀ ਪਾਬੰਦੀ ਲਗਾ ਦਿੱਤੀ ਗਈ ਹੈ। ਤਾਲਿਬਾਨ ਨੇ ਪਤੀ-ਪਤਨੀ ਦੇ ਰੈਸਟੋਰੈਂਟ 'ਚ ਇਕੱਠੇ ਬੈਠਣ 'ਤੇ ਪਾਬੰਦੀ ਲਗਾ ਦਿੱਤੀ ਹੈ। ਅੱਤਵਾਦੀ ਸੰਗਠਨ ਨੇ ਫਰਮਾਨ ਜਾਰੀ ਕੀਤਾ ਹੈ ਕਿ ਔਰਤਾਂ ਅਤੇ ਪੁਰਸ਼ ਵੱਖ-ਵੱਖ ਦਿਨਾਂ 'ਤੇ ਪਾਰਕਾਂ 'ਚ ਜਾ ਸਕਦੇ ਹਨ। ਇਸ ਤੋਂ ਪਹਿਲਾਂ ਅਫਗਾਨਿਸਤਾਨ ਦੇ ਤੀਜੇ ਸਭ ਤੋਂ ਵੱਡੇ ਸ਼ਹਿਰ ਹੇਰਾਤ 'ਚ ਔਰਤਾਂ ਨੂੰ ਡਰਾਈਵਿੰਗ ਲਾਇਸੈਂਸ ਜਾਰੀ ਕਰਨ 'ਤੇ ਪਾਬੰਦੀ ਲਗਾ ਦਿੱਤੀ ਗਈ ਸੀ ਅਤੇ ਆਪਣੇ ਪੂਰੇ ਸਰੀਰ ਨੂੰ ਢੱਕਣ ਲਈ ਕਿਹਾ ਗਿਆ ਸੀ।

Also Read: ਕਰੋੜਾਂ ਦੀ ਜਾਇਦਾਦ ਦੀ ਮਾਲਕ ਹੈ Sunny Leone! ਜਾਣੋ ਇੱਕ ਸਾਲ 'ਚ ਕਿੰਨੀ ਕਰਦੀ ਹੈ ਕਮਾਈ

ਕਾਬੁਲ ਨਿਊਜ਼ ਮੁਤਾਬਕ ਹੇਰਾਤ ਵਿੱਚ ਇੱਕ ਤਾਲਿਬਾਨ ਦੀ ਜੇਲ੍ਹ ਵੀ ਹੈ ਜਿੱਥੇ ਔਰਤਾਂ ਨੂੰ ਮਰਦ ਸਾਥੀਆਂ ਤੋਂ ਬਿਨਾਂ ਟੈਕਸੀ ਵਿੱਚ ਬੈਠਣ ਲਈ ਬਿਨਾਂ ਮੁਕੱਦਮੇ ਦੇ ਕੈਦ ਕੀਤਾ ਜਾਂਦਾ ਹੈ। ਸਕੂਲ ਦੀਆਂ ਵਿਦਿਆਰਥਣਾਂ ਨੂੰ ਆਪਣੇ ਪੁਰਸ਼ ਸਹਿਪਾਠੀਆਂ ਨਾਲ ਤਸਵੀਰਾਂ ਖਿਚਵਾਉਣ ਲਈ ਵੀ ਸਜ਼ਾ ਦਿੱਤੀ ਜਾਂਦੀ ਹੈ। ਤਾਲਿਬਾਨ ਅਜਿਹੀਆਂ ਕਾਰਵਾਈਆਂ ਨੂੰ ਅਪਰਾਧ ਮੰਨਦਾ ਹੈ। ਅਫਗਾਨਿਸਤਾਨ ਵਿੱਚ ਮਨੁੱਖੀ ਅਧਿਕਾਰਾਂ ਅਤੇ ਔਰਤਾਂ ਦੇ ਅਧਿਕਾਰਾਂ ਦੀ ਖੁੱਲ੍ਹੇਆਮ ਉਲੰਘਣਾ ਕੀਤੀ ਜਾ ਰਹੀ ਹੈ। ਤਾਲਿਬਾਨ ਵੀ ਆਪਣੇ ਪਿਛਲੇ ਕਾਰਜਕਾਲ ਦੇ ਮੁਕਾਬਲੇ ਉਦਾਰਤਾ ਨਾਲ ਰਾਜ ਕਰਨ ਦੇ ਆਪਣੇ ਵਾਅਦੇ ਤੋਂ ਪਿੱਛੇ ਹਟ ਗਿਆ ਹੈ।

ਪਤੀ-ਪਤਨੀ 'ਤੇ ਵੀ ਲਾਗੂ ਹੁੰਦੇ ਹਨ ਨਿਯਮ 
ਨਵੇਂ ਹੁਕਮ ਦੀ ਪੁਸ਼ਟੀ ਕਰਦੇ ਹੋਏ ਤਾਲਿਬਾਨ ਦੇ ਇਕ ਅਧਿਕਾਰੀ ਨੇ ਕਿਹਾ ਕਿ ਔਰਤਾਂ ਅਤੇ ਮਰਦਾਂ ਨੂੰ ਰੈਸਟੋਰੈਂਟ 'ਚ ਵੱਖਰੇ ਤੌਰ 'ਤੇ ਬੈਠਣ ਲਈ ਕਿਹਾ ਗਿਆ ਹੈ। ਰਿਆਜ਼ੁੱਲਾ ਸੀਰਤ ਨੇ ਏਐੱਫਪੀ ਨੂੰ ਦੱਸਿਆ ਕਿ ਰੈਸਟੋਰੈਂਟ ਮਾਲਕਾਂ ਨੂੰ ਜ਼ਬਾਨੀ ਚੇਤਾਵਨੀ ਦਿੱਤੀ ਗਈ ਹੈ ਕਿ ਨਿਯਮ ਹਰ ਕਿਸੇ 'ਤੇ ਲਾਗੂ ਹੁੰਦੇ ਹਨ "ਭਾਵੇਂ ਉਹ ਪਤੀ-ਪਤਨੀ ਕਿਉਂ ਨਾ ਹੋਣ"। ਇਕ ਅਫਗਾਨ ਔਰਤ ਨੇ ਦੱਸਿਆ ਕਿ ਬੁੱਧਵਾਰ ਨੂੰ ਹੇਰਾਤ ਦੇ ਇਕ ਰੈਸਟੋਰੈਂਟ ਦੇ ਮੈਨੇਜਰ ਨੇ ਉਸ ਨੂੰ ਅਤੇ ਉਸ ਦੇ ਪਤੀ ਨੂੰ ਵੱਖ-ਵੱਖ ਬੈਠਣ ਲਈ ਕਿਹਾ। ਰੈਸਟੋਰੈਂਟ ਮਾਲਕ ਤਾਲਿਬਾਨ ਦੇ ਇਸ ਹੁਕਮ ਨੂੰ ਆਪਣੇ ਕਾਰੋਬਾਰ ਦੇ ਨੁਕਸਾਨ ਵਜੋਂ ਦੇਖ ਰਹੇ ਹਨ।

Also Read: 'ਪਹਿਲਾਂ ਲਈਆਂ ਗੱਡੀਆਂ ਤੇ ਹੁਣ ਮੰਗ ਲਿਆ ਤੇਲ ਖਰਚੇ ਦਾ ਹਿਸਾਬ', CM ਮਾਨ ਦੀ ਸਾਬਕਾ ਮੰਤਰੀਆਂ 'ਤੇ ਸਖਤਾਈ

ਔਰਤਾਂ ਘਰੇ ਹੀ ਕਰਨ ਕਸਰਤ
ਤਾਲਿਬਾਨ ਅਧਿਕਾਰੀ ਨੇ ਦੱਸਿਆ ਕਿ ਉਸ ਦੇ ਦਫਤਰ ਵੱਲੋਂ ਜਾਰੀ ਹੁਕਮਾਂ ਮੁਤਾਬਕ ਔਰਤਾਂ ਅਤੇ ਮਰਦ ਵੱਖ-ਵੱਖ ਦਿਨਾਂ 'ਤੇ ਹੇਰਾਤ ਦੇ ਪਾਰਕਾਂ 'ਚ ਜਾਣਗੇ। ਸੀਰਤ ਨੇ ਕਿਹਾ ਕਿ ਔਰਤਾਂ ਨੂੰ ਵੀਰਵਾਰ, ਸ਼ੁੱਕਰਵਾਰ ਅਤੇ ਸ਼ਨੀਵਾਰ ਨੂੰ ਪਾਰਕਾਂ 'ਚ ਜਾਣ ਲਈ ਕਿਹਾ ਗਿਆ ਹੈ। ਦੂਜੇ ਦਿਨ ਆਦਮੀ ਪਾਰਕਾਂ ਵਿੱਚ ਜਾ ਸਕਦੇ ਹਨ। ਜੇਕਰ ਔਰਤਾਂ ਇਸ ਸਮੇਂ ਦੌਰਾਨ ਕਸਰਤ ਕਰਨਾ ਚਾਹੁੰਦੀਆਂ ਹਨ ਤਾਂ ਬਿਹਤਰ ਹੈ ਕਿ ਉਹ ਇਸ ਨੂੰ ਆਪਣੇ ਘਰ ਹੀ ਕਰਨ। ਦੇਸ਼ ਭਰ ਵਿੱਚ ਪਹਿਲਾਂ ਹੀ ਔਰਤਾਂ ਨੂੰ ਇਕੱਲਿਆਂ ਬਾਹਰ ਜਾਣ ਦੀ ਮਨਾਹੀ ਹੈ ਅਤੇ ਹੁਣ ਹੇਰਾਤ ਵਿੱਚ ਵੀ ਔਰਤਾਂ ਦੇ ਡਰਾਈਵਿੰਗ ਲਾਇਸੈਂਸ ਬੰਦ ਹੋ ਗਏ ਹਨ।