ਸਾਉਣ ਮਹੀਨੇ ਇੰਝ ਖੁਦ ਬਣਾਓ ਸ਼ਿਵਲਿੰਗ ਤੇ ਕਰੋ ਪੂਜਾ, ਭਗਵਾਨ ਭੋਲੇਨਾਥ ਨੂੰ ਪ੍ਰਸੰਨ ਕਰਨ ਦਾ ਜਾਣੋ ਆਸਾਨ ਤਰੀਕਾ

Sawan Month : ਸਾਉਣ ਦਾ ਪਵਿੱਤਰ ਮਹੀਨਾ ਸ਼ੁਰੂ ਹੋਣ ਵਾਲਾ ਹੈ। ਇਹ ਪੂਰਾ ਮਹੀਨਾ ਭਗਵਾਨ ਸ਼ਿਵ ਨੂੰ ਸਮਰਪਿਤ ਹੈ। ਭਗਵਾਨ ਭੋਲੇਨਾਥ ਦੇ ਭਗਤ ਪੂਰੀ ਸ਼ਰਧਾ ਨਾਲ ਉਨ੍ਹਾਂ ਦੀ ਪੂਜਾ ਸ਼ੁਰੂ ਕਰਦੇ ਹਨ। ਕਿਹਾ ਜਾਂਦਾ ਹੈ ਕਿ ਸਾਉਣ ਮਹੀਨੇ ਵਿੱਚ ਭੋਲੇਨਾਥ ਖੁਦ ਧਰਤੀ ਦੇ ਦਰਸ਼ਨ ਕਰਨ ਆਉਂਦੇ ਹਨ। ਇਸ ਕਾਰਨ ਉਹ ਆਪਣੇ ਸ਼ਰਧਾਲੂਆਂ ਦੀਆਂ ਸਾਰੀਆਂ ਮਨੋਕਾਮਨਾਵਾਂ ਪੂਰੀਆਂ ਕਰਦਾ ਹੈ।
ਸਾਉਣ ਵਿੱਚ ਭਗਵਾਨ ਸ਼ਿਵ ਨੂੰ ਪ੍ਰਸੰਨ ਕਰਨ ਲਈ, ਸਾਡੇ ਸ਼ਾਸਤਰਾਂ ਵਿੱਚ ਕਈ ਤਰ੍ਹਾਂ ਦੇ ਵਿਧੀ-ਵਿਧਾਨ ਅਤੇ ਵਰਤਾਂ ਦਾ ਵਰਣਨ ਕੀਤਾ ਗਿਆ ਹੈ, ਜੋ ਕਿ ਸ਼ਰਧਾਲੂਆਂ ਨੂੰ ਭਗਵਾਨ ਸ਼ਿਵ ਦਾ ਆਸ਼ੀਰਵਾਦ ਪ੍ਰਾਪਤ ਕਰਨ ਵਿੱਚ ਮਦਦ ਕਰਦੇ ਹਨ। ਅੱਜ ਅਸੀਂ ਤੁਹਾਨੂੰ ਸ਼ਾਸਤਰਾਂ ਵਿੱਚ ਦਰਜ ਪਾਰਥਿਵ ਸ਼ਿਵਲਿੰਗ ਦੀ ਪੂਜਾ ਕਰਨ ਦੀ ਵਿਧੀ, ਇਸ ਨੂੰ ਬਣਾਉਣ ਦੀ ਵਿਧੀ ਆਦਿ ਬਾਰੇ ਵਿਸਥਾਰ ਵਿੱਚ ਦੱਸਣ ਜਾ ਰਹੇ ਹਾਂ।
ਇਸ ਤਰ੍ਹਾਂ ਬਣਾਇਆ ਜਾਂਦਾ ਹੈ ਪਾਰਥਿਵ ਸ਼ਿਵਲਿੰਗ 
ਪਾਰਥਿਵ ਸ਼ਿਵਲਿੰਗ ਦਾ ਅਰਥ ਹੈ ਮਿੱਟੀ ਦਾ ਸ਼ਿਵਲਿੰਗ। ਆਪਣੇ ਹੱਥਾਂ ਨਾਲ ਸ਼ਿਵਲਿੰਗ ਬਣਾ ਕੇ ਸਾਉਣ ਦੇ ਮਹੀਨੇ ਇਸ ਦੀ ਪੂਜਾ ਕਰਨ ਨਾਲ ਭਗਵਾਨ ਭੋਲੇਨਾਥ ਪ੍ਰਸੰਨ ਹੋ ਜਾਂਦੇ ਹਨ ਤੇ ਸ਼ਰਧਾਲੂ ਦੀਆਂ ਸਾਰੀਆਂ ਮੁਸ਼ਕਲਾਂ ਦੂਰ ਕਰ ਦਿੰਦੇ ਹਨ। ਇਸ ਨੂੰ ਬਣਾਉਣ ਲਈ ਪਹਿਲਾਂ ਤੁਹਾਨੂੰ ਥੋੜੀ ਮਿੱਟੀ ਦੀ ਲੋੜ ਪਵੇਗੀ। ਸ਼ਿਵ ਪੁਰਾਣ ਅਨੁਸਾਰ ਪਾਰਥਿਵ ਸ਼ਿਵਲਿੰਗ ਬਣਾਉਣ ਲਈ ਅਜਿਹੀ ਮਿੱਟੀ ਦੀ ਵਰਤੋਂ ਕਰਨੀ ਚਾਹੀਦੀ ਹੈ, ਜੋ ਕਿਸੇ ਵੀ ਤਰ੍ਹਾਂ ਨਾਲ ਦੂਸ਼ਿਤ ਨਾ ਹੋਈ ਹੋਵੇ। ਜੇਕਰ ਤੁਹਾਨੂੰ ਅਜਿਹੀ ਮਿੱਟੀ ਨਹੀਂ ਮਿਲਦੀ ਤਾਂ ਤੁਸੀਂ ਆਪਣੇ ਘੜੇ ਦੀ ਮਿੱਟੀ ਦੀ ਵਰਤੋਂ ਕਰ ਸਕਦੇ ਹੋ।
ਗੰਗਾ ਜਲ ਦੀ ਵਰਤੋਂ ਕਰੋ
ਪਾਰਥਿਕ ਸ਼ਿਵਲਿੰਗ ਬਣਾਉਣ ਲਈ ਗੰਗਾ ਜਲ ਦੀ ਵਰਤੋਂ ਕਰਨੀ ਚਾਹੀਦੀ ਹੈ। ਸਾਫ਼ ਮਿੱਟੀ ਲਓ ਅਤੇ ਇਸ ਵਿੱਚ ਗੰਗਾ ਜਲ ਮਿਲਾ ਲਓ। ਤੁਸੀਂ ਲੁਬਰੀਕੇਸ਼ਨ ਲਈ ਥੋੜ੍ਹੀ ਜਿਹੀ ਮੁਲਤਾਨੀ ਮਿੱਟੀ ਵੀ ਪਾ ਸਕਦੇ ਹੋ। ਹੁਣ ਗਾਂ ਦਾ ਦੁੱਧ, ਦਹੀਂ ਅਤੇ ਸ਼ੁੱਧ ਦੇਸੀ ਘਿਓ ਨੂੰ ਮਿਲਾ ਕੇ ਚੰਗੀ ਤਰ੍ਹਾਂ ਗੁੰਨ੍ਹ ਕੇ ਮਿੱਟੀ ਤਿਆਰ ਕਰੋ। ਇਕ ਬੇਲਪੱਤਰ ਲਓ ਅਤੇ ਉਸ 'ਤੇ ਮਿੱਟੀ ਤੋਂ ਸ਼ਿਵਲਿੰਗ ਵਰਗਾ ਆਕਾਰ ਬਣਾਉਣਾ ਸ਼ੁਰੂ ਕਰੋ। ਸ਼ਿਵਲਿੰਗ ਨੂੰ ਚੰਗਾ ਆਕਾਰ ਦੇਣ ਲਈ ਤੁਸੀਂ ਇਸ 'ਚ ਰੂੰ ਪਾ ਸਕਦੇ ਹੋ। ਹੱਥਾਂ ਦੀ ਮਦਦ ਨਾਲ ਹੌਲੀ-ਹੌਲੀ ਸ਼ਿਵਲਿੰਗ ਦਾ ਆਕਾਰ ਬਣਾਉਂਦੇ ਰਹੋ। ਤੁਹਾਡਾ ਪਾਰਥਿਵ ਸ਼ਿਵਲਿੰਗ ਤਿਆਰ ਹੋ ਜਾਵੇਗਾ। ਤੁਸੀਂ ਚਾਹੋ ਤਾਂ ਸ਼ਿਵਲਿੰਗ 'ਤੇ ਸੱਪ ਦੀ ਸ਼ਕਲ ਵੀ ਬਣਾ ਸਕਦੇ ਹੋ।
ਇਸ ਤਰ੍ਹਾਂ ਕਰੋ ਪੂਜਾ
ਇੱਕ ਵਾਰ ਜਦੋਂ ਤੁਹਾਡਾ ਪਾਰਥਿਵ ਸ਼ਿਵਲਿੰਗ ਤਿਆਰ ਹੋ ਜਾਂਦਾ ਹੈ, ਤਾਂ ਇਸ ਨੂੰ ਇੱਕ ਪਲੇਟ ਵਿੱਚ ਰੱਖੋ ਅਤੇ ਇਸ ਨੂੰ ਮੰਦਰ ਵਿੱਚ ਸਥਾਪਿਤ ਕਰੋ। ਸਾਉਣ ਦੇ ਪੂਰੇ ਮਹੀਨੇ ਇਸ ਦੀ ਪੂਜਾ ਕਰੋ। ਚੰਦਨ ਅਤੇ ਅਕਸ਼ਤ ਦੀ ਮਦਦ ਨਾਲ ਸ਼ਿਵਲਿੰਗ ਨੂੰ ਸਜਾਓ। ਸਾਉਣ ਦੇ ਮਹੀਨੇ ਪਾਰਥਿਵ ਸ਼ਿਵਲਿੰਗ ਦੀ ਪੂਜਾ ਦਾ ਵਿਸ਼ੇਸ਼ ਮਹੱਤਵ ਹੈ। ਧਿਆਨ ਰਹੇ ਕਿ ਇਸ ਨੂੰ ਆਪਣੇ ਹੱਥਾਂ ਨਾਲ ਬਣਾਓ ਅਤੇ ਇਸ ਨੂੰ ਬਣਾਉਂਦੇ ਸਮੇਂ ਸ਼ਿਵ ਦਾ ਜਾਪ ਕਰਦੇ ਰਹੋ।