ਮਾਛੀਵਾੜਾ ਸਾਹਿਬ: ਕਿਸੇ ਮਾਪਿਆਂ ਲਈ ਇਸ ਤੋਂ ਵੱਡਾ ਦੁੱਖ ਕੀ ਹੋਵੇਗਾ ਕਿ ਜਿਨ੍ਹਾਂ ਪੁੱਤਾਂ ਨੇ ਬੁਢਾਪੇ ਦੀ ਲਾਠੀ ਬਣਨਾ ਸੀ, ਅੱਜ ਉਹ ਖ਼ੁਦ ਜ਼ਿੰਦਗੀ ਅਤੇ ਮੌਤ ਦੀ ਜੰਗ ਲੜ ਰਹੇ ਹਨ। ਮਾਛੀਵਾੜਾ ਨੇੜਲੇ ਪਿੰਡ ਭੱਟੀਆਂ ਵਿੱਚ ਇੱਕ ਅਜਿਹਾ ਹੀ ਮੰਦਭਾਗਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਭਿਆਨਕ ਸੜਕ ਹਾਦਸੇ ਨੇ ਗਰੀਬ ਮਾਪਿਆਂ ਦੇ ਦੋ ਜਵਾਨ ਪੁੱਤਰਾਂ ਨੂੰ ਅਪਾਹਿਜ ਬਣਾ ਦਿੱਤਾ ਹੈ। ਅੱਜ ਇਹ ਪਰਿਵਾਰ ਆਪਣੇ ਬੱਚਿਆਂ ਦੇ ਇਲਾਜ ਲਈ ਦਰ-ਦਰ ਦੀਆਂ ਠੋਕਰਾਂ ਖਾਣ ਲਈ ਮਜਬੂਰ ਹੈ।
ਸ੍ਰੀ ਦਰਬਾਰ ਸਾਹਿਬ ਤੋਂ ਵਾਪਸੀ ਵੇਲੇ ਵਾਪਰਿਆ ਸੀ ਕਹਿਰ
ਪੀੜਤ ਮਾਤਾ ਨਿਰਮਲਾ ਨੇ ਦੱਸਿਆ ਕਿ 9 ਨਵੰਬਰ ਦਾ ਦਿਨ ਉਨ੍ਹਾਂ ਦੇ ਪਰਿਵਾਰ ਲਈ ਕਾਲਾ ਦਿਨ ਸਾਬਤ ਹੋਇਆ। ਉਸਦੇ ਦੋ ਪੁੱਤਰ ਬਿਕਰਮ ਅਤੇ ਵਿਸ਼ਾਲ ਆਪਣੇ ਦੋਸਤ ਹਰਦੇਵ ਸਿੰਘ ਨਾਲ ਸ੍ਰੀ ਦਰਬਾਰ ਸਾਹਿਬ ਮੱਥਾ ਟੇਕ ਕੇ ਵਾਪਸ ਆ ਰਹੇ ਸਨ। ਬਿਆਸ ਨੇੜੇ ਉਨ੍ਹਾਂ ਦੀ ਕਾਰ ਹਾਦਸੇ ਦਾ ਸ਼ਿਕਾਰ ਹੋ ਗਈ। ਇਸ ਹਾਦਸੇ ਵਿੱਚ ਉਨ੍ਹਾਂ ਦੇ ਦੋਸਤ ਦੀ ਮੌਤ ਹੋ ਗਈ, ਜਦਕਿ ਬਿਕਰਮ ਅਤੇ ਵਿਸ਼ਾਲ ਗੰਭੀਰ ਰੂਪ ਵਿੱਚ ਜ਼ਖ਼ਮੀ ਹੋ ਗਏ।
ਇੱਕ ਦੀਆਂ ਦੋਵੇਂ ਬਾਹਾਂ ਕੱਟੀਆਂ, ਦੂਜੇ ਦੀ ਰੀੜ ਦੀ ਹੱਡੀ ਟੁੱਟੀ
ਹਾਦਸਾ ਇੰਨਾ ਭਿਆਨਕ ਸੀ ਕਿ ਬਿਕਰਮ ਦੀਆਂ ਦੋਵੇਂ ਬਾਹਾਂ ਡਾਕਟਰਾਂ ਨੂੰ ਕੱਟਣੀਆਂ ਪਈਆਂ ਅਤੇ ਉਸ ਦੀ ਲੱਤ ਵੀ ਕਈ ਜਗ੍ਹਾ ਤੋਂ ਟੁੱਟ ਗਈ। ਦੂਜੇ ਪਾਸੇ ਛੋਟੇ ਪੁੱਤਰ ਵਿਸ਼ਾਲ ਦਾ ਚੂਲ੍ਹਾ ਅਤੇ ਰੀੜ ਦੀ ਹੱਡੀ ਦੇ ਮਣਕੇ ਟੁੱਟ ਗਏ ਹਨ। ਵਿਸ਼ਾਲ ਇਸ ਵੇਲੇ ਬਿਸਤਰੇ ‘ਤੇ ਨਿਢਾਲ ਪਿਆ ਹੈ ਅਤੇ ਉੱਠ ਕੇ ਬੈਠਣ ਤੋਂ ਵੀ ਅਸਮਰੱਥ ਹੈ। ਪਰਿਵਾਰ ਕੋਲ ਜੋ ਵੀ ਜਮ੍ਹਾਂ ਪੂੰਜੀ ਸੀ, ਉਹ ਪਹਿਲੇ ਆਪ੍ਰੇਸ਼ਨਾਂ ਅਤੇ ਦਵਾਈਆਂ ‘ਤੇ ਖਰਚ ਹੋ ਚੁੱਕੀ ਹੈ।
सम्बंधित ख़बरें
ਆਰਥਿਕ ਤੰਗੀ: ਹੁਣ ਆਪ੍ਰੇਸ਼ਨ ਲਈ ਚਾਹੀਦੇ ਨੇ ਲੱਖਾਂ ਰੁਪਏ
ਡਾਕਟਰਾਂ ਅਨੁਸਾਰ ਜੇਕਰ ਵਿਸ਼ਾਲ ਦੀ ਰੀੜ ਦੀ ਹੱਡੀ ਦਾ ਆਪ੍ਰੇਸ਼ਨ ਕਰਵਾਇਆ ਜਾਵੇ ਤਾਂ ਉਹ ਮੁੜ ਆਪਣੇ ਪੈਰਾਂ ‘ਤੇ ਖੜ੍ਹਾ ਹੋ ਸਕਦਾ ਹੈ, ਪਰ ਇਸ ‘ਤੇ ਕਰੀਬ 2 ਲੱਖ ਰੁਪਏ ਦਾ ਖਰਚਾ ਆਵੇਗਾ। ਪਰਿਵਾਰ ਦੇ ਹਾਲਾਤ ਇਹ ਹਨ ਕਿ ਪਹਿਲਾਂ ਦੋਵੇਂ ਪੁੱਤਰ ਕੰਮ ਕਰਕੇ ਘਰ ਚਲਾਉਂਦੇ ਸਨ, ਪਰ ਹੁਣ ਮਾਪੇ ਵੀ ਉਨ੍ਹਾਂ ਦੀ ਸਾਂਭ-ਸੰਭਾਲ ਕਾਰਨ ਮਜ਼ਦੂਰੀ ਕਰਨ ਨਹੀਂ ਜਾ ਸਕਦੇ। ਘਰ ਵਿੱਚ ਰੋਟੀ ਦੇ ਲਾਲੇ ਪਏ ਹੋਏ ਹਨ ਅਤੇ ਦਵਾਈਆਂ ਦਾ ਖਰਚਾ ਚੁੱਕਣਾ ਵੀ ਮੁਸ਼ਕਿਲ ਹੋ ਰਿਹਾ ਹੈ।
ਮਦਦ ਲਈ ਅਪੀਲ: ਤੁਹਾਡਾ ਇੱਕ ਸਹਿਯੋਗ ਬਚਾ ਸਕਦਾ ਹੈ ਜ਼ਿੰਦਗੀ
ਲਾਚਾਰ ਮਾਤਾ ਨਿਰਮਲਾ ਅਤੇ ਪਿਤਾ ਨੇ ਸਮਾਜ ਸੇਵੀ ਸੰਸਥਾਵਾਂ, ਦਾਨੀ ਸੱਜਣਾਂ ਅਤੇ ਪੰਜਾਬ ਸਰਕਾਰ ਨੂੰ ਮਦਦ ਦੀ ਅਪੀਲ ਕੀਤੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਕੋਈ ਦਾਨੀ ਸੱਜਣ ਉਨ੍ਹਾਂ ਦੇ ਪੁੱਤਰ ਦੇ ਆਪ੍ਰੇਸ਼ਨ ਵਿੱਚ ਸਹਿਯੋਗ ਕਰੇ ਤਾਂ ਉਨ੍ਹਾਂ ਦਾ ਪੁੱਤਰ ਮੁੜ ਚੱਲਣ-ਫਿਰਨ ਦੇ ਯੋਗ ਹੋ ਸਕਦਾ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਇੱਥੇ ਕਰੋ ਕਲਿੱਕ : https://livingindianews.co.in/terrible-accident-in-mumbai-out-of-control-best-bus-crushes-13-people-4-including-3-women-die-many-seriously-injured/
ਖ਼ਬਰਾਂ ਲਈ ਲਿਵਿੰਗ ਇੰਡੀਆ ਨਿਊਜ਼ 24/7 ਲਾਈਵ ਨਾਲ ਜੁੜੇ ਰਹੋ