ਹੁਣ ਬ੍ਰਿਟੇਨ ਤੋਂ ਆਉਣ ਵਾਲੇ ਲੋਕਾਂ ਨੂੰ 10 ਦਿਨ ਰਹਿਣਾ ਪਵੇਗਾ ਕੁਆਰੰਟਾਈਨ

ਨਵੀਂ ਦਿੱਲੀ: ਭਾਰਤੀ ਯਾਤਰੀਆਂ ਨੂੰ ਬਰਤਾਨੀਆ ਜਾਣ ’ਤੇ ਹੋਣ ਵਾਲੀਆਂ ਪਰੇਸ਼ਾਨੀਆਂ ਨੂੰ ਵੇਖਦੇ ਹੋਏ ਭਾਰਤ ਸਰਕਾਰ ਨੇ ਵੀ ਸਖ਼ਤ ਫ਼ੈਸਲਾ ਲਿਆ ਹੈ। ਸਰਕਾਰ ਨੇ ਯੂਕੇ ਤੋਂ ਆਉਣ ਵਾਲੇ ਬਰਤਾਨਵੀ ਨਾਗਰਿਕਾਂ ਲਈ 72 ਘੰਟੇ ਦੇ ਅੰਦਰ ਆਰਟੀਪੀਸੀਆਰ ਟੈਸਟ ਜ਼ਰੂਰੀ ਕਰ ਦਿੱਤਾ ਹੈ। ਇਸ ਤੋਂ ਇਲਾਵਾ ਬਰਤਾਨੀਆ ਤੋਂ ਭਾਰਤ ਆਉਣ ’ਤੇ 10 ਦਿਨ ਇਕਾਂਤਵਾਸ ਵੀ ਰਹਿਣਾ ਪਵੇਗਾ।

ਭਾਰਤ ਆਉਣ ਵਾਲੇ ਬਰਤਾਨਵੀ ਨਾਗਰਿਕਾਂ ਨੂੰ ਟੀਕਾਕਰਨ ਦੀ ਸਥਿਤੀ ’ਤੇ ਧਿਆਨ ਦਿੱਤੇ ਬਿਨਾਂ ਚਾਰ ਅਕਤੂਬਰ ਤੋਂ 10 ਦਿਨਾਂ ਦੇ ਜ਼ਰੂਰੀ ਕੁਆਰੰਟਾਈਨ ’ਚੋਂ ਲੰਘਣਾ ਪਵੇਗਾ। ਅਧਿਕਾਰਕ ਸੂਤਰਾਂ ਨੇ ਕਿਹਾ ਕਿ ਭਾਰਤ ਆਉਣ ਵਾਲੇ ਬਰਤਾਨਵੀ ਨਾਗਰਿਕਾਂ ’ਤੇ ਪਰਸਪਰਿਕ ਕਾਰਵਾਈ ਕਰਨ ਦੇ ਫ਼ੈਸਲਾ ਕੀਤਾ ਹੈ, ਕਿਉਂਕਿ ਯੂਕੇ ਨਾਲ ਸਬੰਧਿਤ ਭਾਰਤੀ ਵੈਕਸੀਨ ਸਰਟੀਫਿਕੇਟਾਂ ਨੂੰ ਮਾਨਤਾ ਨਾ ਦੇਣ ਦੇ ਮੁੱਦੇ ਨੂੰ ਹੱਲ ਨਹੀਂ ਕੀਤਾ ਜਾ ਸਕਦਾ।

ਸੂਤਰਾਂ ਨੇ ਕਿਹਾ ਕਿ ਮਾਪਦੰਡਾਂ ਤਹਿਤ ਯੂਕੇ ਤੋਂ ਭਾਰਤ ਆਉਣ ਵਾਲੇ ਸਾਰੇ ਬਰਤਾਨਵੀ ਨਾਗਰਿਕਾਂ ਨੂੰ ਉਨ੍ਹਾਂ ਦੇ ਟੀਕਾ ਲੱਗਣ ਦੇ ਬਾਵਜ਼ੂਦ ਯਾਤਰਾ ਤੋਂ 72 ਘੰਟੇ ਦੇ ਅੰਦਰ ਦੀ ਕੋਰੋਨਾ ਦੀ ਆਰਟੀਪੀਸੀਆਰ ਰਿਪੋਰਟ ਵਿਖਾਉਣੀ ਪਵੇਗੀ। ਇਸ ਦੇ ਨਾਲ ਹੀ ਬਰਤਾਨਵੀ ਨਾਗਰਿਕਾ ਨੂੰ ਭਾਰਤ ਆਉਣ ਦੇ 8ਵੇਂ ਦਿਨ ਮੁੜ ਤੋਂ ਆਰਟੀਪੀਸੀਆਰ ਟੈਸਟ ਕਰਵਾਉਣਾ ਪਵੇਗਾ। ਉਨ੍ਹਾਂ ਕਿਹਾ ਕਿ ਬਰਤਾਨਵੀ ਨਾਗਰਿਕਾਂ ਦੇ ਆਉਣ ਤੋਂ ਬਾਅਦ 10 ਦਿਨਾਂ ਲਈ ਘਰ ’ਚ ਜ਼ਰੂਰੀ ਕੁਆਰੰਟਾਈਨ ’ਚੋਂ ਲੰਘਣਾ ਪਵੇਗਾ।

Published By: baljit singh

Last Updated: 2021-10-01 20:07:07