ਖਮਾਣੋਂ : ਰੁਜ਼ਗਾਰ ਦੀ ਭਾਲ ਵਿੱਚ ਦੱਖਣੀ ਕੋਰੀਆ ਜਾਣ ਦਾ ਸੁਪਨਾ ਵੇਖਣ ਵਾਲੇ ਪਿੰਡ ਲਖਣਪੁਰ ਦੇ ਇੱਕ ਨੌਜਵਾਨ ਨਾਲ ਵਿਦੇਸ਼ ਦੀ ਧਰਤੀ ‘ਤੇ ਅਣਮਨੁੱਖੀ ਤਸ਼ੱਦਦ ਹੋਣ ਦਾ ਬੇਹੱਦ ਮੰਦਭਾਗਾ ਮਾਮਲਾ ਸਾਹਮਣੇ ਆਇਆ ਹੈ। ਏਜੰਟਾਂ ਵੱਲੋਂ ਨੌਜਵਾਨ ਨੂੰ ਅਗਵਾ ਕਰਕੇ ਉਸ ਦੇ ਪਰਿਵਾਰ ਨੂੰ ਵੀਡੀਓ ਕਾਲ ਰਾਹੀਂ ਤਸ਼ੱਦਦ ਦਿਖਾਇਆ ਜਾ ਰਿਹਾ ਹੈ ਅਤੇ ਰਿਹਾਈ ਦੇ ਬਦਲੇ 25 ਲੱਖ ਰੁਪਏ ਦੀ ਫਰੌਤੀ ਦੀ ਮੰਗ ਕੀਤੀ ਗਈ ਹੈ।
ਕਿਵੇਂ ਸ਼ੁਰੂ ਹੋਇਆ ਇਹ ਸਾਰਾ ਮਾਮਲਾ?
ਪੀੜਤ ਨੌਜਵਾਨ ਹਰਬੰਸ ਸਿੰਘ ਉਰਫ਼ ਹੰਸਾ ਦੀ ਪਤਨੀ ਸੰਜੀਵਨੀ ਕੌਰ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਉਸਦਾ ਪਤੀ ਖਮਾਣੋਂ ਦੇ ਮਨਸੂਰਪੁਰ ਰੋਡ ‘ਤੇ ਹੇਅਰ ਡਰੈਸਰ ਦੀ ਦੁਕਾਨ ਚਲਾਉਂਦਾ ਸੀ। ਪਹਿਲਾਂ ਮਲੇਸ਼ੀਆ ਰਹਿਣ ਦੌਰਾਨ ਉਸਦੀ ਮੁਲਾਕਾਤ ਹਰਿਆਣਾ ਦੇ ਸੁਰਿੰਦਰ ਸਿੰਘ ਉਰਫ਼ ਵਿੱਕੀ ਨਾਲ ਹੋਈ ਸੀ। ਵਿੱਕੀ ਨੇ ਹਰਬੰਸ ਨੂੰ ਝਾਂਸਾ ਦਿੱਤਾ ਕਿ ਉਹ ਉਸ ਨੂੰ 8 ਲੱਖ ਰੁਪਏ ਵਿੱਚ ਦੱਖਣੀ ਕੋਰੀਆ ਭੇਜ ਦੇਵੇਗਾ, ਜਿੱਥੇ ਕਟਿੰਗ ਦੇ ਕੰਮ ਵਿੱਚ ਬਹੁਤ ਚੰਗੀ ਕਮਾਈ ਹੈ।
ਧੋਖੇ ਦਾ ਜਾਲ: ਕੋਰੀਆ ਦੀ ਥਾਂ ਪਹੁੰਚਾ ਦਿੱਤਾ ਈਥੋਪੀਆ
27 ਮਾਰਚ 2026 ਨੂੰ ਏਜੰਟ ਨੇ ਵੀਜ਼ਾ ਲੱਗਣ ਦਾ ਕਹਿ ਕੇ ਹਰਬੰਸ ਨੂੰ ਦਿੱਲੀ ਬੁਲਾਇਆ। 28 ਮਾਰਚ ਨੂੰ ਹਰਬੰਸ ਦਿੱਲੀ ਤੋਂ ਦੁਬਈ ਲਈ ਰਵਾਨਾ ਹੋਇਆ ਅਤੇ ਉੱਥੋਂ ਉਸਨੂੰ ਦੱਖਣੀ ਕੋਰੀਆ ਦੀ ਬਜਾਏ ਈਥੋਪੀਆ ਭੇਜ ਦਿੱਤਾ ਗਿਆ। ਈਥੋਪੀਆ ਪਹੁੰਚ ਕੇ ਹਰਬੰਸ ਨੇ ਪਰਿਵਾਰ ਨੂੰ ਫ਼ੋਨ ‘ਤੇ ਹੋਟਲ ਪਹੁੰਚਣ ਦੀ ਜਾਣਕਾਰੀ ਦਿੱਤੀ, ਪਰ ਉਸ ਤੋਂ ਬਾਅਦ ਉਸਦਾ ਫ਼ੋਨ ਬੰਦ ਹੋ ਗਿਆ ਅਤੇ ਪਰਿਵਾਰ ਨਾਲ ਸੰਪਰਕ ਟੁੱਟ ਗਿਆ।
सम्बंधित ख़बरें
ਵੀਡੀਓ ਕਾਲ ‘ਤੇ ਤਸ਼ੱਦਦ ਦਿਖਾ ਕੇ ਮੰਗੀ ਫਰੌਤੀ
ਪਰਿਵਾਰ ਨੇ ਦੱਸਿਆ ਕਿ 30 ਮਾਰਚ ਨੂੰ ਅਗਵਾਕਾਰਾਂ ਦੇ ਫ਼ੋਨ ਆਉਣੇ ਸ਼ੁਰੂ ਹੋ ਗਏ। ਪਹਿਲਾਂ 8 ਲੱਖ ਰੁਪਏ ਦੀ ਮੰਗ ਕੀਤੀ ਗਈ, ਪਰ ਅਗਲੇ ਹੀ ਦਿਨ 31 ਮਾਰਚ ਨੂੰ ਅਗਵਾਕਾਰਾਂ ਨੇ ਹਰਬੰਸ ਨੂੰ ਬੰਦੀ ਬਣਾ ਕੇ ਉਸ ‘ਤੇ ਹੋ ਰਹੇ ਤਸ਼ੱਦਦ ਦੀ ਵੀਡੀਓ ਕਾਲ ਪਰਿਵਾਰ ਨੂੰ ਦਿਖਾਈ। ਹੁਣ ਅਗਵਾਕਾਰਾਂ ਨੇ 25 ਲੱਖ ਰੁਪਏ ਦੀ ਮੰਗ ਕਰਦਿਆਂ ਧਮਕੀ ਦਿੱਤੀ ਹੈ ਕਿ ਜੇਕਰ ਪੈਸੇ ਨਾ ਮਿਲੇ ਤਾਂ ਨੌਜਵਾਨ ਦਾ ਜਾਨੀ ਨੁਕਸਾਨ ਕਰ ਦਿੱਤਾ ਜਾਵੇਗਾ।
ਪੁਲਿਸ ਕਾਰਵਾਈ ਅਤੇ ਸਿਆਸੀ ਦਖ਼ਲ
ਖਮਾਣੋਂ ਪੁਲਿਸ ਨੇ ਸੰਜੀਵਨੀ ਕੌਰ ਦੇ ਬਿਆਨਾਂ ਦੇ ਆਧਾਰ ‘ਤੇ ਮੁੱਖ ਮੁਲਜ਼ਮ ਸੁਰਿੰਦਰ ਸਿੰਘ ਵਿੱਕੀ (ਹਰਿਆਣਾ) ਅਤੇ ਤਿੰਨ ਹੋਰ ਅਣਪਛਾਤੇ ਵਿਅਕਤੀਆਂ ਖ਼ਿਲਾਫ਼ ਭਾਰਤੀ ਨਿਆਂ ਸੰਹਿਤਾ (BNS) ਦੀਆਂ ਧਾਰਾਵਾਂ 308, 140, 61, ਅਤੇ 351(2) ਤਹਿਤ ਮਾਮਲਾ ਦਰਜ ਕਰ ਲਿਆ ਹੈ।