ਔਨਲਾਈਨ ਡੈਸਕ/ਲਿਵਿੰਗ ਇੰਡੀਆ ਨਿਊਜ਼:- ਪੁਲਿਸ ਨੇ ਡੀਟੀਓ ਦਫ਼ਤਰ ਫਰੀਦਕੋਟ ਵਿੱਚ ਤਾਇਨਾਤ ਪੰਜਾਬ ਪੁਲਿਸ ਕਾਂਸਟੇਬਲ ਅਤੇ ਉਸਦੇ ਦੋ ਹੋਰ ਸਾਥੀਆਂ ਨੂੰ 9 ਚੋਰੀ ਦੀਆਂ ਲਗਜ਼ਰੀ ਗੱਡੀਆਂ ਸਮੇਤ ਕਾਬੂ ਕੀਤਾ ਹੈ। ਦੋਸ਼ੀ ਚੰਡੀਗੜ੍ਹ, ਦਿੱਲੀ, ਹਰਿਆਣਾ ਅਤੇ ਮੱਧ ਪ੍ਰਦੇਸ਼ ਤੋਂ ਲਗਜ਼ਰੀ ਕਾਰਾਂ ਚੋਰੀ ਕਰਦੇ ਸਨ ਅਤੇ ਨੰਬਰ ਪਲੇਟ ਅਤੇ ਆਰਸੀ ਬਦਲ ਕੇ ਵੇਚਦੇ ਸਨ। ਮੁਲਜ਼ਮ ਕੋਲੋਂ ਛੇ ਮੋਬਾਈਲ, 24 ਜਾਅਲੀ ਆਰਸੀ, ਰੰਗ ਦੇ ਪ੍ਰਿੰਟ, ਲੈਪਟਾਪ ਅਤੇ ਡੀਟੀਓ ਦਫ਼ਤਰ ਫਰੀਦਕੋਟ ਦੇ ਸਟੈਂਪ ਬਰਾਮਦ ਹੋਏ ਹਨ। ਸਭ ਤੋਂ ਵੱਡੀ ਗੱਲ ਇਹ ਹੈ ਕਿ, ਇਨ੍ਹਾਂ ਚੋਰੀਆਂ ਪਿੱਛੇ ਪੰਜਾਬ ਪੁਲਿਸ ਦੇ ਕਾੰਸਟੇਬਲ ਦਾ ਮਾਸਟਰ ਮਾਇੰਡ ਸੀ।
ਐਸਐਸਪੀ ਧਰੁਵ ਦਹੀਆ ਨੇ ਦੱਸਿਆ ਕਿ, ਜਦੋਂ ਪੁਲਿਸ ਨੇ ਪਿੰਡ ਠੱਠਾ ਨੇੜੇ ਚੌਕੀ ਵਿਖੇ ਇਨੋਵਾ ਕ੍ਰਿਸਟਾ ਨੂੰ ਰੋਕਿਆ ਤਾਂ ਗੱਡੀ ਦੇ ਦਸਤਾਵੇਜ਼ ਜਾਅਲੀ ਨਿਕਲੇ। ਗੱਡੀ ‘ਚ ਸਵਾਰ ਰਛਪਾਲ ਸਿੰਘ ਨਿਵਾਸੀ ਆਕਾਸ਼ ਐਵੀਨਿਉ, ਨਿਰਮਲ ਸਿੰਘ ਨਿਵਾਸੀ ਮਿਲਾਪ ਐਵੀਨਿਉ ਅਤੇ ਰਮਨ ਕੁਮਾਰ ਨਿਵਾਸੀ ਗਲੀ ਨੰਬਰ -2 ਸੰਧੂ ਕਲੋਨੀ ਅੰਮ੍ਰਿਤਸਰ ਨੂੰ ਪੁਲਿਸ ਨੇ ਗ੍ਰਿਫਤਾਰ ਕਰ ਲਿਆ ਹੈ।
ਇਨ੍ਹਾਂ ਦੋਸ਼ੀਆਂ ਤੋਂ ਕੀਤੀ ਪੁੱਛਗਿੱਛ ਦੌਰਾਨ ਪਤਾ ਚੱਲਿਆ ਕਿ, ਉਨ੍ਹਾਂ ਨੇ ਇਹ ਕਾਰ ਦਿੱਲੀ ਤੋਂ ਚੋਰੀ ਕੀਤੀ ਸੀ। ਡੀਟੀਓ ਦਫਤਰ ਫ਼ਰੀਦਕੋਟ ਤੋਂ ਜਾਅਲੀ ਦਸਤਾਵੇਜ਼ਾਂ ਅਤੇ ਆਰਸੀ ਤਿਆਰ ਕਰਕੇ ਝਬਬਲ ਕਸਬੇ ਵਿੱਚ ਵੇਚਣ ਜਾ ਰਿਹਾ ਸੀ। ਰਛਪਾਲ ਇੱਕ ਪੰਜਾਬ ਪੁਲਿਸ ਦਾ ਕਾਂਸਟੇਬਲ ਹੈ ਅਤੇ ਉਸਦੀ ਡਿਉਟੀ, ਡੀਟੀਓ ਦਫਤਰ ਫਰੀਦਕੋਟ ਵਿੱਚ ਹੈ। ਉਹ ਆਪਣੇ ਦੋ ਸਾਥੀ ਨਿਰਮਲ ਅਤੇ ਰਮਨ ਨਾਲ ਚੰਡੀਗੜ੍ਹ, ਦਿੱਲੀ, ਹਰਿਆਣਾ, ਮੱਧ ਪ੍ਰਦੇਸ਼ ਤੋਂ ਲਗਜ਼ਰੀ ਕਾਰਾਂ ਦੀ ਚੋਰੀ ਨੂੰ ਅੰਜਾਮ ਦੇ ਚੁੱਕਿਆ ਹੈ।
ਐਸਐਸਪੀ ਧਰੁਵ ਦਹੀਆ ਨੇ ਕਿਹਾ ਕਿ, ਦੋਸ਼ੀ ਕਾਂਸਟੇਬਲ ਰਛਪਾਲ ਸਿੰਘ ਨੇ ਮੰਨਿਆ ਹੈ ਕਿ, ਹੁਣ ਤੱਕ ਉਸਨੇ ਦੋ ਦਰਜਨ ਤੋਂ ਵੱਧ ਨਕਲੀ ਆਰਸੀ ਤਿਆਰ ਕੀਤੀ ਹੈ। ਚੋਰੀ ਕੀਤੇ ਵਾਹਨ ਸਾਰੇ ਰਾਜ ਵਿੱਚ ਵਿਕ ਚੁੱਕੇ ਹਨ। ਫਰੀਦਕੋਟ ਵਿੱਚ ਰਛਪਾਲ ਖ਼ਿਲਾਫ਼ ਚੋਰੀ ਦੀਆਂ ਦੋ ਵਾਰਦਾਤਾਂ ਹਨ। ਤਿੰਨੋਂ ਮੁਲਜ਼ਮਾਂ ਨੂੰ ਦੋ ਦਿਨਾਂ ਦੇ ਰਿਮਾਂਡ ’ਤੇ ਪੁਲਿਸ ਹਿਰਾਸਤ ‘ਚ ਰੱਖਿਆ ਗਿਆ ਹੈ।