ਮੁੰਬਈ : ਬਾਲੀਵੁੱਡ ਦੇ ਮਸ਼ਹੂਰ ਅਦਾਕਾਰ ਰਣਵੀਰ ਸਿੰਘ ਆਪਣੀਆਂ ਹਰਕਤਾਂ ਕਾਰਨ ਕਾਨੂੰਨੀ ਪੰਗਿਆਂ ਵਿੱਚ ਫਸ ਗਏ ਹਨ। ਰਣਵੀਰ ਦੇ ਖਿਲਾਫ ਬੈਂਗਲੁਰੂ ਵਿੱਚ ਇੱਕ ਐਫਆਈਆਰ (FIR) ਦਰਜ ਕੀਤੀ ਗਈ ਹੈ, ਜਿਸ ਵਿੱਚ ਉਨ੍ਹਾਂ ‘ਤੇ ਪਵਿੱਤਰ ‘दैव’ (Daiva) ਪਰੰਪਰਾ ਦਾ ਅਪਮਾਨ ਕਰਨ ਅਤੇ ਉਸ ਦਾ ਮਜ਼ਾਕ ਉਡਾਉਣ ਦੇ ਗੰਭੀਰ ਦੋਸ਼ ਲਾਏ ਗਏ ਹਨ। ਇਹ ਸ਼ਿਕਾਇਤ ਐਡਵੋਕੇਟ ਪ੍ਰਸ਼ਾਂਤ ਮੇਥਲ ਵੱਲੋਂ ਦਰਜ ਕਰਵਾਈ ਗਈ ਹੈ, ਜਿਨ੍ਹਾਂ ਦਾ ਕਹਿਣਾ ਹੈ ਕਿ ਅਦਾਕਾਰ ਨੇ ਰਿਸ਼ਭ ਸ਼ੈੱਟੀ ਦੀ ਫ਼ਿਲਮ ‘ਕਾਂਤਾਰਾ ਚੈਪਟਰ 1’ ਦੇ ਪਵਿੱਤਰ ਪਾਤਰ ਦੀ ਨਕਲ ਕਰਕੇ ਕਰੋੜਾਂ ਹਿੰਦੂਆਂ ਦੀਆਂ ਭਾਵਨਾਵਾਂ ਨੂੰ ਠੇਸ ਪਹੁੰਚਾਈ ਹੈ।
ਕੀ ਹੈ ਪੂਰਾ ਮਾਮਲਾ? ਵਕੀਲ ਨੇ ਦਿੱਤਾ ਵਿਸਥਾਰ
ਐਡਵੋਕੇਟ ਪ੍ਰਸ਼ਾਂਤ ਮੇਥਲ ਨੇ ਨਿਊਜ਼ ਏਜੰਸੀ ANI ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਹ ਵਿਵਾਦ 28 ਨਵੰਬਰ 2025 ਨੂੰ ਗੋਆ ਵਿੱਚ ਆਯੋਜਿਤ ‘ਇੰਟਰਨੈਸ਼ਨਲ ਫਿਲਮ ਫੈਸਟੀਵਲ’ (IFFI) ਦੌਰਾਨ ਸ਼ੁਰੂ ਹੋਇਆ ਸੀ। ਦੋਸ਼ ਹੈ ਕਿ ਇਸ ਸਮਾਗਮ ਵਿੱਚ ਰਣਵੀਰ ਸਿੰਘ ਨੇ ਫ਼ਿਲਮ ‘ਕਾਂਤਾਰਾ’ ਦੇ ‘ਗੁਲੀਗਾ ਦੈਵਾ’ ਦਾ ਮਜ਼ਾਕ ਉਡਾਇਆ ਅਤੇ ਦੇਵੀ ਚਾਮੁੰਡੀ ਨੂੰ ‘ਭੂਤਨੀ’ ਕਹਿ ਕੇ ਸੰਬੋਧਨ ਕੀਤਾ। ਪ੍ਰਸ਼ਾਂਤ ਅਨੁਸਾਰ, ਜਦੋਂ ਪੁਲਿਸ ਪ੍ਰਸ਼ਾਸਨ ਨੇ ਸ਼ੁਰੂ ਵਿੱਚ ਕਾਰਵਾਈ ਨਹੀਂ ਕੀਤੀ, ਤਾਂ ਉਨ੍ਹਾਂ ਨੇ ਅਦਾਲਤ ਦਾ ਦਰਵਾਜ਼ਾ ਖੜਕਾਇਆ। ਹੁਣ ਅਦਾਲਤ ਦੇ ਹੁਕਮਾਂ ਤੋਂ ਬਾਅਦ ਹਾਈ ਗਰਾਊਂਡਸ ਪੁਲਿਸ ਨੇ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।
BNS ਦੀਆਂ ਗੰਭੀਰ ਧਾਰਾਵਾਂ ਤਹਿਤ ਦਰਜ ਹੋਇਆ ਕੇਸ
ਇਸ ਸ਼ਿਕਾਇਤ ਵਿੱਚ ਭਾਰਤੀ ਨਿਆਂ ਸੰਹਿਤਾ (BNS) ਦੀਆਂ ਧਾਰਾਵਾਂ 196, 299 ਅਤੇ 302 ਸ਼ਾਮਲ ਕੀਤੀਆਂ ਗਈਆਂ ਹਨ। ਜੇਕਰ ਇਹ ਦੋਸ਼ ਸਾਬਤ ਹੋ ਜਾਂਦੇ ਹਨ, ਤਾਂ ਅਦਾਕਾਰ ਨੂੰ 3 ਸਾਲ ਤੱਕ ਦੀ ਕੈਦ, ਜੁਰਮਾਨਾ ਜਾਂ ਦੋਵੇਂ ਹੋ ਸਕਦੇ ਹਨ। ਅਦਾਲਤ ਨੇ 28 ਜਨਵਰੀ 2026 ਨੂੰ ਪੁਲਿਸ ਨੂੰ ਮਾਮਲੇ ਦੀ ਜਾਂਚ ਕਰਨ ਅਤੇ ਐਫਆਈਆਰ ਦਰਜ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਸ਼ਿਕਾਇਤਕਰਤਾ ਦਾ ਕਹਿਣਾ ਹੈ ਕਿ ਕਿਸੇ ਦੇਵਤਾ ਨੂੰ ‘ਭੂਤ’ ਕਹਿਣਾ ਈਸ਼ਨਿੰਦਾ ਦੇ ਬਰਾਬਰ ਹੈ ਅਤੇ ਇਹ ਧਾਰਮਿਕ ਮਾਨਤਾਵਾਂ ਦਾ ਘੋਰ ਅਪਮਾਨ ਹੈ।
सम्बंधित ख़बरें
ਮਾਫੀ ਮੰਗਣ ਦੇ ਬਾਵਜੂਦ ਨਹੀਂ ਘਟੀ ਮੁਸੀਬਤ
ਜ਼ਿਕਰਯੋਗ ਹੈ ਕਿ ਜਦੋਂ ਇਹ ਵੀਡੀਓ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋਈ ਸੀ, ਤਾਂ ਰਣਵੀਰ ਸਿੰਘ ਦੀ ਕਾਫੀ ਆਲੋਚਨਾ ਹੋਈ ਸੀ। ਰਣਵੀਰ ਨੇ ਰਿਸ਼ਭ ਸ਼ੈੱਟੀ ਦੀ ਅਦਾਕਾਰੀ ਦੀ ਤਾਰੀਫ਼ ਕਰਦੇ ਹੋਏ ਕਿਹਾ ਸੀ, “ਤੁਹਾਡੀ ਅਦਾਕਾਰੀ ਸ਼ਾਨਦਾਰ ਸੀ, ਖਾਸ ਕਰਕੇ ਉਹ ਸ਼ਾਟ ਜਦੋਂ ਇੱਕ ਮਹਿਲਾ ਭੂਤ ਤੁਹਾਡੇ ਸਰੀਰ ਵਿੱਚ ਪ੍ਰਵੇਸ਼ ਕਰਦੀ ਹੈ।” ਵਿਵਾਦ ਵਧਦਾ ਦੇਖ ਰਣਵੀਰ ਸਿੰਘ ਨੇ ਪਹਿਲਾਂ ਮਾਫੀ ਵੀ ਮੰਗੀ ਸੀ, ਪਰ ਹੁਣ ਕਾਨੂੰਨੀ ਸ਼ਿਕਾਇਤ ਦਰਜ ਹੋਣ ਤੋਂ ਬਾਅਦ ਉਨ੍ਹਾਂ ਦੀਆਂ ਮੁਸ਼ਕਲਾਂ ਮੁੜ ਵਧਦੀਆਂ ਨਜ਼ਰ ਆ ਰਹੀਆਂ ਹਨ।