ਅਬੋਹਰ : ਵਰਿੰਦਾਵਨ ਵਿੱਚ ਵਾਪਰੇ ਭਿਆਨਕ ਕਿਸ਼ਤੀ ਹਾਦਸੇ ਨੇ ਅਬੋਹਰ ਸ਼ਹਿਰ ਦੇ ਇੱਕ ਪਰਿਵਾਰ ਦੀਆਂ ਖ਼ੁਸ਼ੀਆਂ ਨੂੰ ਉਮਰ ਭਰ ਦੇ ਗਮ ਵਿੱਚ ਬਦਲ ਦਿੱਤਾ ਹੈ। ਇਸ ਹਾਦਸੇ ਦਾ ਸ਼ਿਕਾਰ ਹੋਏ ਨਵੀਂ ਆਬਾਦੀ ਨਿਵਾਸੀ 25 ਸਾਲਾ ਨੌਜਵਾਨ ਮਾਣਿਕ ਟੰਡਨ ਦੀ ਮ੍ਰਿਤਕ ਦੇਹ ਜਦੋਂ ਅੱਜ ਸਵੇਰੇ ਉਸ ਦੇ ਗ੍ਰਹਿ ਵਿਖੇ ਪਹੁੰਚੀ, ਤਾਂ ਪੂਰੇ ਇਲਾਕੇ ਵਿੱਚ ਮਾਤਮ ਪਸਰ ਗਿਆ। ਮਾਣਿਕ ਦੀ ਅੰਤਿਮ ਯਾਤਰਾ ਵਿੱਚ ਸ਼ਾਮਲ ਹੋਣ ਲਈ ਹਜ਼ਾਰਾਂ ਲੋਕਾਂ ਦਾ ਹੜ੍ਹ ਉਮੜ ਪਿਆ ਅਤੇ ਹਰ ਅੱਖ ਨਮ ਨਜ਼ਰ ਆਈ।
ਜਿੱਥੇ ਗੂੰਜਣੀਆਂ ਸਨ ਸ਼ਹਿਨਾਈਆਂ, ਉੱਥੇ ਪੈ ਰਹੇ ਨੇ ਵੈਣ
ਸਵੇਰੇ ਕਰੀਬ 8 ਵਜੇ ਜਿਵੇਂ ਹੀ ਮਾਣਿਕ ਦੀ ਦੇਹ ਘਰ ਪਹੁੰਚੀ, ਮਾਂ ਅਤੇ ਭੈਣਾਂ ਦੇ ਕਰੁਣਾਮਈ ਵਿਰਲਾਪ ਨੇ ਪੱਥਰ ਦਿਲਾਂ ਨੂੰ ਵੀ ਪਿਘਲਾ ਦਿੱਤਾ। ਸਭ ਤੋਂ ਦਰਦਨਾਕ ਮੰਜ਼ਰ ਮਾਣਿਕ ਦੀ ਮੰਗੇਤਰ ਦਾ ਸੀ, ਜਿਸ ਨੇ ਕੁਝ ਹੀ ਮਹੀਨਿਆਂ ਬਾਅਦ ਉਸ ਨਾਲ ਨਵੀਂ ਜ਼ਿੰਦਗੀ ਸ਼ੁਰੂ ਕਰਨੀ ਸੀ। ਦੱਸਿਆ ਜਾ ਰਿਹਾ ਹੈ ਕਿ ਮਾਣਿਕ ਦਾ ਵਿਆਹ ਇਸੇ ਸਾਲ ਸਤੰਬਰ ਮਹੀਨੇ ਵਿੱਚ ਹੋਣਾ ਸੀ। ਉਸ ਨੇ ਵਿਆਹ ਲਈ ਸ਼ਹਿਰ ਦਾ ਇੱਕ ਵੱਡਾ ਪੈਲੇਸ ਵੀ ਬੁੱਕ ਕਰ ਲਿਆ ਸੀ। ਪਰਿਵਾਰ ਨੇ ਉਸ ਦੀਆਂ ਖ਼ੁਸ਼ੀਆਂ ਲਈ ਕਈ ਸੁਪਨੇ ਸਜਾਏ ਸਨ, ਜੋ ਪਲਾਂ ਵਿੱਚ ਹੀ ਚੂਰ-ਚੂਰ ਹੋ ਗਏ।
ਵਰਿੰਦਾਵਨ ਦੀ ਯਾਤਰਾ ਸਾਬਤ ਹੋਈ ਆਖ਼ਰੀ ਸਫ਼ਰ
ਮਾਣਿਕ ਬੜੇ ਚਾਅ ਨਾਲ ਵਰਿੰਦਾਵਨ ਮੱਥਾ ਟੇਕਣ ਗਿਆ ਸੀ ਅਤੇ ਵਾਪਸ ਆ ਕੇ ਉਸ ਨੇ ਵਿਆਹ ਦੀਆਂ ਬਾਕੀ ਤਿਆਰੀਆਂ ਕਰਨੀਆਂ ਸਨ। ਕਿਸੇ ਨੂੰ ਕੀ ਪਤਾ ਸੀ ਕਿ ਜਿਹੜਾ ਨੌਜਵਾਨ ਦੂਲ੍ਹਾ ਬਣਨ ਦੀ ਤਿਆਰੀ ਕਰ ਰਿਹਾ ਸੀ, ਉਹ ਕਫ਼ਨ ਵਿੱਚ ਲਿਪਟ ਕੇ ਵਾਪਸ ਆਵੇਗਾ। ਉਸ ਦੀ ਬਜ਼ੁਰਗ ਮਾਂ ਅਤੇ ਦੋਵੇਂ ਭੈਣਾਂ ਦਾ ਰੋ-ਰੋ ਕੇ ਬੁਰਾ ਹਾਲ ਸੀ, ਜਿਨ੍ਹਾਂ ਨੂੰ ਦਿਲਾਸਾ ਦੇਣ ਵਾਲਾ ਕੋਈ ਨਜ਼ਰ ਨਹੀਂ ਸੀ ਆ ਰਿਹਾ।
ਨਮ ਅੱਖਾਂ ਨਾਲ ਦਿੱਤੀ ਗਈ ਅੰਤਿਮ ਵਿਦਾਈ
ਦੁਪਹਿਰ ਵੇਲੇ ਇੰਦਰਾ ਨਗਰੀ ਰੋਡ ਸਥਿਤ ਮੁੱਖ ਸ਼ਿਵਪੁਰੀ ਵਿਖੇ ਮਾਣਿਕ ਟੰਡਨ ਦਾ ਅੰਤਿਮ ਸੰਸਕਾਰ ਕਰ ਦਿੱਤਾ ਗਿਆ। ਇਸ ਮੌਕੇ ਸਮਾਜ ਸੇਵੀ ਰਾਜੂ ਚਰਾਇਆ ਅਤੇ ਊਸ਼ਾ ਮਾਤਾ ਮੰਦਰ ਤੋਂ ਸ਼ਸ਼ੀ ਦੇਵਾ ਜੀ ਨੇ ਗਹਿਰੇ ਦੁੱਖ ਦਾ ਪ੍ਰਗਟਾਵਾ ਕੀਤਾ। ਉਨ੍ਹਾਂ ਕਿਹਾ ਕਿ 25 ਸਾਲ ਦੀ ਭਰ ਜਵਾਨੀ ਵਿੱਚ ਮਾਣਿਕ ਦਾ ਚਲੇ ਜਾਣਾ ਪਰਿਵਾਰ ਅਤੇ ਪੂਰੇ ਸ਼ਹਿਰ ਲਈ ਇੱਕ ਅਜਿਹਾ ਘਾਟਾ ਹੈ ਜੋ ਕਦੇ ਪੂਰਾ ਨਹੀਂ ਹੋ ਸਕਦਾ। ਸ਼ਹਿਰ ਵਾਸੀਆਂ ਨੇ ਪ੍ਰਮਾਤਮਾ ਅੱਗੇ ਅਰਦਾਸ ਕੀਤੀ ਕਿ ਪੀੜਤ ਪਰਿਵਾਰ ਨੂੰ ਇਸ ਅਸਹਿ ਦੁੱਖ ਨੂੰ ਸਹਿਣ ਦਾ ਬਲ ਬਖਸ਼ੇ।