ਬਿਆਸ ਤੋਂ ਬਾਅਦ ਜਲੰਧਰ ‘ਚ ਮਸੂਮ ਬਣੀ ਹੈਵਾਨੀਅਤ ਦੀ ਸ਼ਿਕਾਰ !

ਔਨਲਾਈਨ ਡੈਸਕ/ਲਿਵਿੰਗ ਇੰਡੀਆ ਨਿਊਜ਼:- ਬਿਆਸ ਤੋਂ ਬਾਅਦ ਹੁਣ ਜਲੰਧਰ ‘ਚ ਨਿੱਕੀ ਬੱਚੀ ਨਾਲ ਜਬਰ-ਜਨਾਹ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਦੂਜੀ ਜਮਾਤ ਵਿੱਚ ਪੜ੍ਹਨ ਵਾਲੀ ਮਸੂਮ ਨਾਲ ਦਰਿੰਦਗੀ ਦੇ ਦੋਸ਼ ਵਿੱਚ ਪੁਲਿਸ ਨੇ ਸਕੂਲ ਬੱਸ ਕੰਡਕਟਰ ਅਤੇ ਡਰਾਈਵਰ ਨੂੰ ਗ੍ਰਿਫਤਾਰ ਕੀਤਾ ਹੈ। ਮਾਮਲਾ 22 ਦਿਨਾਂ ਪੁਰਾਣਾ ਹੈ। ਬੱਚੇ ਦੀ ਜਾਂਚ ਰਿਪੋਰਟ ਵਿੱਚ ਪਿਸ਼ਾਬ ਵਿੱਚ ਖੂਨ ਪਾਇਆ ਗਿਆ ਹੈ। ਜ਼ਿਲ੍ਹਾ ਬਾਲ ਸੁਰੱਖਿਆ ਇਕਾਈ ਦੀ ਸ਼ਿਕਾਇਤ ‘ਤੇ ਇਸ ਮਾਮਲੇ ਵਿੱਚ ਕਾਰਵਾਈ ਕੀਤੀ ਗਈ ਹੈ।

ਹਾਲਾਂਕਿ ਦੋਵਾਂ ਸਕੂਲ ਬੱਸ ਕੰਡਕਟਰ ਅਤੇ ਡਰਾਈਵਰ ਤੋਂ ਪੁੱਛਗਿੱਛ ਜਾਰੀ ਹੈ ਅਤੇ ਦੂਜੇ ਪਾਸੇ ਘਟਨਾ ਦੇ ਸਾਹਮਣੇ ਆਉਣ ਤੋਂ ਬਾਅਦ ਇਲਾਕੇ ਦੇ ਲੋਕਾਂ ਵਿੱਚ ਰੋਸ ਦਾ ਮਾਹੌਲ ਬਣਿਆ ਹੋਇਆ ਹੈ। ਪਰਿਵਾਰ ਮੁਤਾਬਿਕ 28 ਨਵੰਬਰ ਨੂੰ ਸਕੂਲ ਦੀ ਛੁੱਟੀ ਤੋਂ ਬਾਅਦ, ਕੁੜੀ ਬੱਸ ਵਿੱਚ ਘਰ ਪਰਤੀ ਸੀ।  ਹਾਸਾ ਉਸ ਕੁੜੀ ਦੇ ਚਿਹਰੇ ਤੋਂ ਗਾਇਬ ਸੀ ਜੋ ਹਮੇਸ਼ਾਂ ਹੱਸਦੀ ਰਹਿੰਦੀ ਸੀ। ਪਰਿਵਾਰ ਨੇ ਸਮਝਿਆ ਬੱਚੀ ਥੱਕ ਗਈ ਹੈ। ਰਾਤ ਨੂੰ ਬੱਚੀ ਨੂੰ ਬੁਖਾਰ ਹੋ ਗਿਆ, ਸਵੇਰ ਤੱਕ ਬੁਖਾਰ ਠੀਕ ਨਹੀਂ ਨ ਹੋਣ ‘ਤੇ ਬੱਚੀ ਨੂੰ ਕਲੀਨਿਕ ਲਿਜਾਇਆ ਗਿਆ ਤਾਂ ਲੜਕੀ ਨੇ ਕਿਹਾ ਕਿ ਪੇਸ਼ਾਬ ਕਰਨ ‘ਚ ਪਰੇਸ਼ਾਨੀ ਹੋ ਰਹੀ ਹੈ, ਇਸ ਲਈ ਯੂਰਿਨ ਟੈਸਟ ਕਰਨ ਲਈ ਭੇਜਿਆ ਗਿਆ। ਟੈਸਟ ਰਿਪੋਰਟ ਨੇ ਹੈਰਾਨ ਕਰ ਦਿੱਤਾ, ਪਿਸ਼ਾਬ ਵਿੱਚ ਖੂਨ ਸੀ।

ਬੱਚੀ ਨਾਲ ਕੁਝ ਗਲਤ ਹੋਣ ਦੇ ਡਰੋਂ ਪਰਿਵਾਰ ਸਿਵਲ ਹਸਪਤਾਲ ਆਇਆ। ਇੱਥੇ ਡਾਕਟਰ ਨੇ ਲੜਕੀ ਦੀ ਜਾਂਚ ਕੀਤੀ ਅਤੇ ਕਿਹਾ ਕਿ ਉਸ ਨਾਲ ਛੇੜਛਾੜ ਕੀਤੀ ਗਈ ਸੀ। ਬੱਚੀ ਨੇ ਮਾਂ ਨੂੰ ਦੱਸਿਆ ਕਿ, ਟੋਪੀ ਵਾਲੇ ਅੰਕਲ ਨੇ ਗਲਤ ਹਰਕਤ ਕੀਤੀ ਸੀ। ਪਰਿਵਾਰ ਨੇ ਬਦਨਾਮੀ ਦੇ ਡਰ ਤੋਂ ਚੁੱਪੀ ਸਾਧ ਲਈ ਪਰ ਬੱਚੀ ਦੇ ਦਾਦੇ ਨੇ ਹਿੰਮਤ ਕਰਦਿਆਂ ਚਾਇਲਡ ਹੇਲਪਲਾਇਨ ਨੰਬਰ 1098 ‘ਤੇ  ਫੋਨ ਕਰ ਸਾਰੀ ਜਾਣਕਾਰੀ ਦੇ ਦਿੱਤੀ।

ਜ਼ਿਲ੍ਹਾ ਬਾਲ ਸੁਰੱਖਿਆ ਯੂਨਿਟ ਦੀ ਟੀਮ ਤੁਰੰਤ ਹਰਕਤ ਵਿੱਚ ਆਈ ਅਤੇ ਥਾਣਾ ਰਾਮਾ ਮੰਡੀ ਸ਼ਿਕਾਇਤ ਕਰਨ ਲਈ ਪਰਿਵਾਰ ਕੋਲ ਆਇਆ, ਪਰ ਪਰਿਵਾਰ ਨੇ ਕਿਹਾ ਕਿ,  ਉਹ ਇਕ ਵਾਰ ਸੋਚਣਾ ਚਾਹੁੰਦੇ ਹਨ। ਡੀਸੀਪੀਯੂ ਨੂੰ ਪਤਾ ਲੱਗਿਆ ਕਿ ਬੱਸ ਵਿੱਚ ਲੜਕੀ ਨਾਲ ਗੰਦੀ ਹਰਕਤ ਵਾਪਰੀ ਹੈ। ਇਹ ਇਲਾਕਾ ਦਿਹਾਤੀ ਪੁਲਿਸ ਦਾ ਹੈ, ਫਿਰ ਐਸਐਸਪੀ ਨਵਜੋਤ ਮਾਹਲ ਨੂੰ ਸ਼ਿਕਾਇਤ ਕੀਤੀ ਗਈ। ਪੁਲਿਸ ਨੇ ਵੀਰਵਾਰ ਰਾਤ 25 ਸਾਲਾ ਡਰਾਈਵਰ ਹਰਪ੍ਰੀਤ ਸਿੰਘ ਵਾਸੀ ਨਾਰੰਗਪੁਰ ਅਤੇ 50 ਸਾਲਾ ਚਾਲਕ ਦਲਬੀਰ ਸਿੰਘ ਵਸੀ ਹਰੀਪੁਰ ਨੂੰ ਗ੍ਰਿਫਤਾਰ ਕਰ ਲਿਆ।

ਐਸਐਸਪੀ ਨਵਜੋਤ ਸਿੰਘ ਮਾਹਲ ਅਨੁਸਾਰ ਜ਼ਿਲ੍ਹਾ ਬਾਲ ਸੁਰੱਖਿਆ ਯੂਨਿਟ ਦੀ ਸ਼ਿਕਾਇਤ ’ਤੇ ਐਫਆਈਆਰ ਦਰਜ ਕਰਨ ਦੇ ਆਦੇਸ਼ ਦਿੱਤੇ ਗਏ ਸਨ। ਐਸਐਸਪੀ ਨੇ ਜਾਂਚ ਲਈ ਵਿਸ਼ੇਸ਼ ਜਾਂਚ ਟੀਮ ਖੜ੍ਹੀ ਕੀਤੀ ਸੀ। ਜਾਂਚ ਦੌਰਾਨ ਇਹ ਸਾਹਮਣੇ ਆਇਆ ਹੈ ਕਿ, ਲੜਕੀ ਨਾਲ ਬੱਸ ਦੇ ਕੰਡਕਟਰ ਨੇ  ਘ੍ਰਿਣਾਯੋਗ ਹਰਕਤ ਕੀਤੀ ਸੀ। ਟੀਮ ਸਭ ਤੋਂ ਪਹਿਲਾਂ ਇਹ ਪਤਾ ਲਗਾਉਣ ਲਈ ਕਿ ਲੜਕੀ ਕਿਹੜੀ ਬੱਸ ਵਿਚ ਜਾਂਦੀ ਸੀ, ਰਾਮਾਂ ਮੰਡੀ-ਹੁਸ਼ਿਆਰਪੁਰ ਰੋਡ ਸਥਿਤ ਇਕ ਪ੍ਰਾਈਵੇਟ ਸਕੂਲ ਪਹੁੰਚੀ। ਪੁਲਿਸ ਨੇ ਸਭ ਤੋ ਪਹਿਲਾਂ ਬੱਸ ਦੇ ਡਰਾਈਵਰ ਅਤੇ ਕੰਡਕਟਰ ਨੂੰ ਗ੍ਰਿਫਤਾਰ ਕਰ ਜਾਂਚ ਵਿੱਚ ਲਿਆ। ਕਿਉਂਕਿ ਇਹ ਤਾਂ ਸਪੱਸ਼ਟ ਸੀ ਕਿ ਬੱਚੇ ਨਾਲ ਜੋ ਹੋਇਆ ਹੈ, ਉਹ ਬੱਸ ਵਿਚ ਵਾਪਰਿਆ ਹੈ। ਵੀਰਵਾਰ ਦੇਰ ਰਾਤ ਤੱਕ ਦੋਵੇਂ ਦੋਸ਼ੀ ਸਵੀਕਾਰ ਨਹੀਂ ਕਰ ਰਹੇ ਸਨ ਕਿ, ਉਨ੍ਹਾਂ ਨੇ ਲੜਕੀ ਨਾਲ ਘ੍ਰਿਣਾਯੋਗ ਹਰਕਤਾਂ ਕੀਤੀਆਂ ਸਨ।

https://www.facebook.com/LivingIndiaNewschannel/videos/2423303847986028/

ਜਾਂਚ ਟੀਮ ਬੱਚੀ ਨੂੰ ਮਿਲਣ ਘਰ ਪਹੁੰਚੀ। ਇੱਥੇ ਟੀਮ ਨੂੰ ਦੱਸਿਆ ਗਿਆ ਕਿ, ਬੱਚੀ ਆਪਣੀ ਮਾਂ ਨਾਲ ਸ਼ਹਿਰ ਤੋਂ ਬਾਹਰ ਗਈ ਹੋਈ ਹੈ। ਟੀਮ ਨੇ ਨਿੱਕੀ ਬੱਚੀ ਦੇ ਦਾਦਾ ਨਾਲ ਮੁਲਾਕਾਤ ਕੀਤੀ, ਪਰ ਉਨ੍ਹਾਂ ਦਾ ਜਵਾਬ ਸੀ ਕਿ, ਉਨ੍ਹਾਂ ਦੀ ਪੋਤੀ ਨਾਲ ਅਜਿਹੀ ਕੋਈ ਘਟਨਾ ਨਹੀਂ ਵਾਪਰੀ। ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ, ਚਾਈਲਡ ਹੈਲਪ ਲਾਈਨ ਨੰਬਰ 1098 ਨੂੰ ਕਿਉਂ ਮਿਲਾਇਆ, ਇਸ ਦਾ ਦਾਦੇ ਕੋਲ ਕੋਈ ਕੋਈ ਜਵਾਬ ਨਹੀਂ ਸੀ। ਪੁਲਿਸ ਲੜਕੀ ਦੀ ਡਾਕਟਰੀ ਜਾਂਚ ਕਰਵਾਉਣਾ ਚਾਹੁੰਦੀ ਹੈ।

ਲੜਕੀ ਦਾ ਇਲਾਜ ਕਰਨ ਦੀ ਬਜਾਏ, ਚੁੱਪ ਰਹਿਣ ਦੀ ਦਿੱਤੀ ਸੀ ਸਲਾਹ

ਬੱਸ ਡਰਾਈਵਰ ਅਤੇ ਕੰਡਕਟਰ ਲੜਕੀ ਨਾਲ ਕੀਤੀ ਗਈ ਘਿਨਾਉਣੀ ਹਰਕਤ ਦੇ ਸਬੰਧ ਵਿੱਚ ਜੇਲ੍ਹ ਪਹੁੰਚ ਗਏ ਹਨ। ਇਸ ਦੇ ਨਾਲ ਹੀ ਸਿਵਲ ਹਸਪਤਾਲ ਦੀ ਸਰਕਾਰੀ ਮਹਿਲਾ ਡਾਕਟਰ ਨੇ ਆਪਣੀ ਜ਼ਿੰਮੇਵਾਰੀ ਨੂੰ ਸਹੀ ਢੰਗ ਨਾਲ ਨਹੀਂ ਨਿਭਾਇਆ। ਮਹਿਲਾ ਡਾਕਟਰ ਨੂੰ ਪਤਾ ਲੱਗ ਗਿਆ ਸੀ ਕਿ, ਲੜਕੀ ਨਾਲ ਗੰਦਾ ਸਲੂਕ ਕੀਤਾ ਗਿਆ ਸੀ, ਪਰ ਲੜਕੀ ਦੇ ਪਰਿਵਾਰ ਵਾਲਿਆਂ ਨੂੰ ਹਿੰਮਤ ਦੇਣ ਦੀ ਬਜਾਏ ਚੁੱਪ ਰਹਿਣ ਦੀ ਸਲਾਹ ਦਿੱਤੀ। ਜਾਂਚ ਟੀਮ ਹੁਣ ਸਿਵਲ ਹਸਪਤਾਲ ਦੇ ਡਾਕਟਰ ਨੂੰ ਵੀ ਪੜਤਾਲ ਦੇ ਘੇਰੇ ਵਿੱਚ ਲਵੇਗੀ, ਜੇ ਡਾਕਟਰ ਜਾਂਚ ਵਿੱਚ ਸਹਿਯੋਗ ਕਰਦੀ ਹੈ, ਤਾਂ ਪੁਲਿਸ ਉਸ ਨੂੰ ਸਰਕਾਰੀ ਗਵਾਹ ਬਣਾਏਗੀ, ਨਹੀਂ ਤਾਂ ਸਖਤ ਕਾਰਵਾਈ ਕੀਤੀ ਜਾਵੇਗੀ।