ਔਨਲਾਈਨ ਡੈਸਕ/ਲਿਵਿੰਗ ਇੰਡੀਆ ਨਿਊਜ਼:– ਇੰਡੀਅਨ ਪ੍ਰੀਮੀਅਰ ਲੀਗ ਦਾ ਅਗਲਾ ਸੀਜ਼ਨ 29 ਮਾਰਚ ਤੋਂ ਸ਼ੁਰੂ ਹੋ ਰਿਹਾ ਹੈ। ਇਕ ਪਾਸੇ ਜਿੱਥੇ ਦੁਨੀਆ ਦੀ ਸਭ ਤੋਂ ਮਸ਼ਹੂਰ ਕ੍ਰਿਕਟ ਲੀਗ ਨੂੰ ਲੈ ਕੇ ਪ੍ਰਸ਼ੰਸਕਾਂ ਵਿੱਚ ਰੋਮਾਂਚ ਹੈ, ਉੱਥੇ ਹੀ ਦੂਜੇ ਪਾਸੇ ਕੋਰੋਨਾ ਵਾਇਰਸ ਦਾ ਡਰ ਵੀ ਫੈਲ ਗਿਆ ਹੈ। ਦੁਨੀਆ ਭਰ ਦੇ ਕਈ ਵੱਡੇ ਖੇਡ ਸਮਾਗਮਾਂ ਨੂੰ ਕੋਰੋਨਾ ਕਾਰਨ ਰੱਦ ਕਰ ਦਿੱਤਾ ਗਿਆ ਹੈ ਪਰ ਬੀਸੀਸੀਆਈ ਨੇ ਆਈਪੀਐਲ ਨੂੰ ਸ਼ਡਿਉਲ ਅਨੁਸਾਰ ਜਾਰੀ ਰੱਖਣ ਲਈ ਕਿਹਾ ਹੈ। ਅਜਿਹੀ ਸਥਿਤੀ ਵਿਚ ਨਿਉਜ਼ੀਲੈਂਡ ਕ੍ਰਿਕਟ ਬੋਰਡ ਨੇ ਆਈਪੀਐਲ ਵਿੱਚ ਖੇਡਣ ਆਉਣ ਵਾਲੇ ਆਪਣੇ ਪੰਜ ਖਿਡਾਰੀਆਂ ‘ਤੇ ਖਾਸ ਨਜ਼ਰ ਰੱਖੀ ਹੋਈ ਹੈ।
ਛੇ ਕੀਵੀ ਖਿਡਾਰੀ ਖੇਡਣਗੇ ਆਈਪੀਐਲ
ਭਾਰਤ ਵਿੱਚ ਹੁਣ ਤੱਕ 29 ਸਕਾਰਾਤਮਕ ਮਾਮਲੇ ਸਾਹਮਣੇ ਆਏ ਹਨ, ਜਿਨ੍ਹਾਂ ਵਿੱਚ 16 ਇਤਾਲਵੀ ਸੈਲਾਨੀ ਸ਼ਾਮਲ ਹਨ। ਵਾਇਰਸ ਨੇ ਦੁਨੀਆ ਭਰ ਵਿੱਚ 90,000 ਤੋਂ ਵੱਧ ਲੋਕਾਂ ਨੂੰ ਸੰਕਰਮਿਤ ਕੀਤਾ ਹੈ, 3,000 ਤੋਂ ਵੱਧ ਲੋਕ ਆਪਣੀਆਂ ਜਾਨਾਂ ਗੁਆ ਚੁੱਕੇ ਹਨ। ਨਿਉਜ਼ੀਲੈਂਡ ਕ੍ਰਿਕਟ ਬੋਰਡ ਦੇ ਪੀਆਰ ਹੈੱਡ ਰਿਚਰਡ ਬੌਕ ਨੇ ਪੀਟੀਆਈ ਨੂੰ ਦਿੱਤੇ ਬਿਆਨ ਵਿੱਚ ਕਿਹਾ ਕਿ, “ਨਿਉਜ਼ੀਲੈਂਡ ਦੇ ਸਾਰੇ ਖਿਡਾਰੀ, ਆਦਮੀ ਅਤੇ ਔਰਤਾਂ ਇਸ ਵਾਇਰਸ ਤੋਂ ਬਚਾਅ ਲਈ ਪੂਰੀ ਤਰਾਂ ਨਾਲ ਅਪਡੇਟ ਹੋ ਰਹੇ ਹਨ।” ਆਈਪੀਐਲ ਵਿੱਚ ਖੇਡਣ ਵਾਲੇ ਨਿਉਜ਼ੀਲੈਂਡ ਦੇ ਛੇ ਖਿਡਾਰੀ ਜਿੰਮੀ ਨੀਸ਼ਮ (ਕੇਐਕਸਆਈਪੀ), ਲਾਕੀ ਫਰਗੂਸਨ (ਕੋਲਕਾਤਾ ਨਾਈਟ ਰਾਈਡਰਜ਼), ਮਿਸ਼ੇਲ ਮੈਕਲੈਨਾਘਨ ਅਤੇ ਟ੍ਰੇਂਟ ਬੋਲਟ (ਦੋਵੇਂ ਮੁੰਬਈ ਇੰਡੀਅਨਜ਼), ਕੇਨ ਵਿਲੀਅਮਸਨ (ਸਨਰਾਈਜ਼ਰਜ਼ ਹੈਦਰਾਬਾਦ) ਅਤੇ ਮਿਸ਼ੇਲ ਸੈਂਟਨਰ (ਚੇਨਈ ਸੁਪਰ ਕਿੰਗਜ਼) ਹਨ।
ਹਰ ਖਤਰੇ ਤੋਂ ਨਜਿੱਠਣ ਦੀ ਤਿਆਰੀ
ਬੌਕ ਨੇ ਇਹ ਵੀ ਕਿਹਾ ਕਿ, ਕ੍ਰਿਕਟ ਬੋਰਡ ਬਾਕਾਇਦਾ ਅਪਡੇਟ ਪ੍ਰਾਪਤ ਕਰਨ ਲਈ ਦੇਸ਼ ਦੇ ਸਿਹਤ, ਵਿਦੇਸ਼ ਮਾਮਲਿਆਂ ਅਤੇ ਖੇਡ ਮੰਤਰਾਲੇ ਨਾਲ ਲਗਾਤਾਰ ਸੰਪਰਕ ਵਿੱਚ ਹੈ, ਜੋ ਇਸਦੇ ਖਿਡਾਰੀਆਂ ਦੀ ਸਿਹਤ ਸੁਰੱਖਿਆ ਨੂੰ ਯਕੀਨੀ ਬਣਾਏਗਾ। ਬੌਕ ਨੇ ਅੱਗੇ ਕਿਹਾ, “ਨਿਉਜ਼ੀਲੈਂਡ ਕ੍ਰਿਕਟ ਆਪਣੇ ਮੁੱਖ ਮੈਡੀਕਲ ਅਫਸਰ, ਵਿਦੇਸ਼ ਮੰਤਰਾਲੇ ਅਤੇ ਵਪਾਰ ਮੰਤਰਾਲੇ, ਸਿਹਤ ਅਤੇ ਖੇਡ ਮੰਤਰਾਲੇ ਨਿਉਜ਼ੀਲੈਂਡ ਨਾਲ ਨਿਰੰਤਰ ਗੱਲਬਾਤ ਕਰ ਰਹੀ ਹੈ ਅਤੇ ਵਿਸ਼ਵ ਸਿਹਤ ਸੰਗਠਨ ਤੋਂ ਅਪਡੇਟਸ ਵੀ ਲੈ ਰਹੀ ਹੈ।
ਖਿਡਾਰੀਆਂ ਨੂੰ ਭੀੜ ਤੋਂ ਬਚਣਾ ਹੋਵੇਗਾ
ਭਾਰਤੀ ਕ੍ਰਿਕਟ ਬੋਰਡ ਨੇ ਅਜੇ ਤੱਕ ਵਿਦੇਸ਼ੀ ਅਤੇ ਰਾਸ਼ਟਰੀ ਖਿਡਾਰੀਆਂ ਦੀ ਯਾਤਰਾ ਸੰਬੰਧੀ ਕੋਈ ਸਲਾਹਕਾਰੀ ਜਾਰੀ ਨਹੀਂ ਕੀਤੀ ਹੈ ਪਰ ਆਈਪੀਐਲ ਦੌਰਾਨ ਸੈਲਫੀ ਅਤੇ ਆਟੋਗ੍ਰਾਫ ਦੇ ਹੰਟਰਸ ਦੀ ਗਿਣਤੀ ਕਈ ਗੁਣਾ ਵੱਧ ਜਾਂਦੀ ਹੈ ਅਤੇ ਉਮੀਦ ਕੀਤੀ ਜਾਂਦੀ ਹੈ ਕਿ, ਮੌਜੂਦਾ ਹਾਲਾਤਾਂ ਦੇ ਮੱਦੇਨਜ਼ਰ ਖਿਡਾਰੀ ਜਨਤਕ ਸਮਾਗਮਾਂ ਤੋਂ ਗੁਰੇਜ਼ ਕਰਨ।