ਅਟਲਾਂਟਾ : ਅਮਰੀਕਾ ਦੇ ਜਾਰਜੀਆ ਸੂਬੇ ਤੋਂ ਇੱਕ ਬੇਹੱਦ ਮੰਦਭਾਗੀ ਅਤੇ ਹੈਰਾਨ ਕਰਨ ਵਾਲੀ ਖ਼ਬਰ ਸਾਹਮਣੇ ਆਈ ਹੈ। ਇੱਥੇ Google ਦੀ ਇੱਕ ਸੀਨੀਅਰ ਟੈਕਨਾਲੋਜੀ ਐਗਜ਼ੀਕਿਊਟਿਵ ਅਤੇ ਭਾਰਤੀ-ਅਮਰੀਕੀ ਮਹਿਲਾ Sheetal Vrajeshian ਦਾ ਉਨ੍ਹਾਂ ਦੇ ਹੀ ਪਤੀ ਵੱਲੋਂ ਗੋਲੀ ਮਾਰ ਕੇ ਕਤਲ ਕਰ ਦਿੱਤਾ ਗਿਆ। ਘਰੇਲੂ ਹਿੰਸਾ ਦੀ ਇਸ ਭਿਆਨਕ ਵਾਰਦਾਤ ਦੌਰਾਨ ਮੁਲਜ਼ਮ ਨੇ ਆਪਣੇ 23 ਸਾਲਾ ਪੁੱਤਰ ‘ਤੇ ਵੀ ਗੋਲੀਆਂ ਚਲਾਈਆਂ, ਜਿਸ ਕਾਰਨ ਉਹ ਗੰਭੀਰ ਰੂਪ ਵਿੱਚ ਜ਼ਖਮੀ ਹੋ ਗਿਆ। ਪੁਲਿਸ ਨੇ ਕਾਰਵਾਈ ਕਰਦੇ ਹੋਏ 56 ਸਾਲਾ ਮੁਲਜ਼ਮ ਪਤੀ ਕਿਰਕ ਬੀ. ਵ੍ਰਜੇਸੀਅਨ ਨੂੰ ਅਟਲਾਂਟਾ ਨੇੜੇ ਕੌਬ ਕਾਊਂਟੀ ਵਿੱਚ ਸਥਿਤ ਉਨ੍ਹਾਂ ਦੇ ਘਰੋਂ ਗ੍ਰਿਫ਼ਤਾਰ ਕਰ ਲਿਆ ਹੈ।
ਘਰ ਦੇ ਅੰਦਰ ਮਿਲੀ ਲਾਸ਼
ਸਥਾਨਕ ਮੀਡੀਆ ਰਿਪੋਰਟਾਂ ਅਤੇ ਪੁਲਿਸ ਵਿਭਾਗ ਮੁਤਾਬਕ, ਮੰਗਲਵਾਰ ਰਾਤ ਕਰੀਬ 8 ਵਜੇ ਸਮਰਨਾ ਸ਼ਹਿਰ ਦੇ ਇੱਕ ਘਰ ਵਿੱਚ ਗੋਲੀਬਾਰੀ ਹੋਣ ਦੀ ਸੂਚਨਾ ਮਿਲੀ ਸੀ। ਜਦੋਂ ਪੁਲਿਸ ਟੀਮ ਮੌਕੇ ‘ਤੇ ਪਹੁੰਚੀ ਤਾਂ 57 ਸਾਲਾ ਸ਼ੀਤਲ ਵ੍ਰਜੇਸੀਅਨ ਘਰ ਦੇ ਅੰਦਰ ਖ਼ੂਨ ਨਾਲ ਲੱਥਪੱਥ ਹਾਲਤ ਵਿੱਚ ਮਿਲੀ, ਜਿਨ੍ਹਾਂ ਦੀ ਬਾਅਦ ਵਿੱਚ ਜ਼ਖਮਾਂ ਦੀ ਤਾਬ ਨਾ ਸਹਿੰਦੇ ਹੋਏ ਮੌਤ ਹੋ ਗਈ। ਉੱਥੇ ਹੀ ਉਨ੍ਹਾਂ ਦਾ 23 ਸਾਲਾ ਪੁੱਤਰ ਜੇਸਨ ਵ੍ਰਜੇਸੀਅਨ ਘਰ ਦੇ ਬਾਹਰ ਗੰਭੀਰ ਜ਼ਖਮੀ ਹਾਲਤ ਵਿੱਚ ਮਿਲਿਆ, ਜਿਸ ਨੂੰ ਤੁਰੰਤ ਇਲਾਜ ਲਈ ਸਥਾਨਕ ਹਸਪਤਾਲ ਦਾਖਲ ਕਰਵਾਇਆ ਗਿਆ।
ਮੁਲਜ਼ਮ ਪਤੀ ‘ਤੇ ਕਤਲ ਸਣੇ ਕਈ ਗੰਭੀਰ ਧਾਰਾਵਾਂ ਤਹਿਤ ਮਾਮਲਾ ਦਰਜ
ਪੁਲਿਸ ਨੇ ਮੁਲਜ਼ਮ ਕਿਰਕ ਵ੍ਰਜੇਸੀਅਨ ਨੂੰ ਹਿਰਾਸਤ ਵਿੱਚ ਲੈ ਕੇ ਕੌਬ ਕਾਊਂਟੀ ਐਡਲਟ ਡਿਟੈਂਸ਼ਨ ਸੈਂਟਰ (ਜੇਲ੍ਹ) ਵਿੱਚ ਭੇਜ ਦਿੱਤਾ ਹੈ। ਉਸ ਵਿਰੁੱਧ ਕਤਲ, ਜਾਨ ਲੇਵਾ ਹਮਲਾ ਕਰਨ (ਗੰਭੀਰ ਮਾਰਪੀਟ) ਦੇ ਦੋ ਦੋਸ਼ ਅਤੇ ਗ਼ੈਰ-ਕਾਨੂੰਨੀ ਢੰਗ ਨਾਲ ਹਥਿਆਰ ਰੱਖਣ ਦੇ ਦੋ ਮਾਮਲੇ ਦਰਜ ਕੀਤੇ ਗਏ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਸ਼ੁਰੂਆਤੀ ਤੌਰ ‘ਤੇ ਘਰੇਲੂ ਹਿੰਸਾ ਦਾ ਮਾਮਲਾ ਹੈ ਅਤੇ ਇਸ ਨਾਲ ਆਮ ਜਨਤਾ ਨੂੰ ਕੋਈ ਖ਼ਤਰਾ ਨਹੀਂ ਹੈ। ਫਿਲਹਾਲ ਗੋਲੀਬਾਰੀ ਦੇ ਅਸਲ ਕਾਰਨਾਂ ਅਤੇ ਪੁੱਤਰ ਦੀ ਮੈਡੀਕਲ ਸਥਿਤੀ ਬਾਰੇ ਕੋਈ ਅਧਿਕਾਰਕ ਖੁਲਾਸਾ ਨਹੀਂ ਕੀਤਾ ਗਿਆ ਹੈ।
ਤਕਨਾਲੋਜੀ ਦੇ ਖੇਤਰ ਵਿੱਚ ਵੱਡਾ ਨਾਮ ਸੀ ਸ਼ੀਤਲ ਵ੍ਰਜੇਸੀਅਨ
ਸ਼ੀਤਲ ਵ੍ਰਜੇਸੀਅਨ ਟੈਕਨਾਲੋਜੀ ਦੀ ਦੁਨੀਆ ਵਿੱਚ ਇੱਕ ਸਤਿਕਾਰਤ ਨਾਮ ਸਨ ਅਤੇ ਉਨ੍ਹਾਂ ਕੋਲ ਦੋ ਦਹਾਕਿਆਂ (20 ਸਾਲ) ਤੋਂ ਵੱਧ ਦਾ ਸ਼ਾਨਦਾਰ ਤਜਰਬਾ ਸੀ। ਉਹ ਗੂਗਲ ਵਿੱਚ ‘ਇੰਜੀਨੀਅਰਿੰਗ ਲੀਡਰ’ ਵਜੋਂ ਸੇਵਾਵਾਂ ਨਿਭਾ ਰਹੇ ਸਨ। ਗੂਗਲ ਤੋਂ ਪਹਿਲਾਂ ਉਨ੍ਹਾਂ ਨੇ HomeDepot.com ਲਈ ਮੋਬਾਈਲ ਅਤੇ ਡਿਜੀਟਲ ਟ੍ਰਾਂਸਫਾਰਮੇਸ਼ਨ ਦੇ ਕੰਮਾਂ ਦੀ ਅਗਵਾਈ ਕੀਤੀ ਸੀ, ਜਿੱਥੇ ਉਨ੍ਹਾਂ ਨੇ ਕੰਪਨੀ ਦੇ ਡਿਜੀਟਲ ਹੋਮ ਡੈਕੋਰ ਅਤੇ ਫਰਨੀਸ਼ਿੰਗ ਕਾਰੋਬਾਰ ਨੂੰ ਨਵੀਆਂ ਉਚਾਈਆਂ ‘ਤੇ ਪਹੁੰਚਾਇਆ। ਉਹ ਈ-ਕੌਮਰਸ, ਮਾਰਕੀਟਿੰਗ ਟੈਕਨਾਲੋਜੀ ਅਤੇ ਵੈੱਬ ਟੈਕਨਾਲੋਜੀ ਦੀਆਂ ਮਾਹਿਰ ਮੰਨੇ ਜਾਂਦੇ ਸਨ।
2 ਸਾਫਟਵੇਅਰ ਪੇਟੈਂਟ ਦੀ ਇਨਵੈਂਟਰ ਅਤੇ ਕਈ ਬੋਰਡਾਂ ਦੀ ਮੈਂਬਰ
ਸ਼ੀਤਲ ਦਾ ਸ਼ੁਰੂਆਤੀ ਜੀਵਨ ਇੰਗਲੈਂਡ, ਭਾਰਤ ਅਤੇ ਘਾਨਾ ਵਿੱਚ ਬੀਤਿਆ, ਜਿਸ ਤੋਂ ਬਾਅਦ ਉਹ ਜਾਰਜੀਆ ਇੰਸਟੀਚਿਊਟ ਆਫ ਟੈਕਨਾਲੋਜੀ (Georgia Tech) ਵਿੱਚ ਕੰਪਿਊਟਰ ਸਾਇੰਸ ਦੀ ਉੱਚ ਸਿੱਖਿਆ ਹਾਸਲ ਕਰਨ ਲਈ ਅਮਰੀਕਾ ਆਏ ਸਨ। ਉਹ ਆਪਣੇ ਪਿੱਛੇ ਦੋ ਬੱਚੇ ਜੇਸਨ ਅਤੇ ਜੈਸਿਕਾ ਛੱਡ ਗਏ ਹਨ। ਸ਼ੀਤਲ ਦੇ ਨਾਮ 2 ਸਾਫਟਵੇਅਰ ਪੇਟੈਂਟ ਵੀ ਦਰਜ ਸਨ। ਇਸ ਤੋਂ ਇਲਾਵਾ, ਉਹ ਜਾਰਜੀਆ ਟੈਕ ਕਾਲਜ ਆਫ਼ ਕੰਪਿਊਟਿੰਗ ਦੇ ਐਡਵਾਈਜ਼ਰੀ ਬੋਰਡ ਅਤੇ ਜਾਰਜੀਆ ਟੈਕ ਐਲੂਮਨਾਈ ਐਸੋਸੀਏਸ਼ਨ ਦੇ ਬੋਰਡ ਆਫ਼ ਟਰੱਸਟੀਜ਼ ਦੀ ਸਰਗਰਮ ਮੈਂਬਰ ਵੀ ਸਨ। ਉਨ੍ਹਾਂ ਦੀ ਮੌਤ ਨਾਲ ਭਾਰਤੀ-ਅਮਰੀਕੀ ਭਾਈਚਾਰੇ ਅਤੇ ਟੈਕ ਜਗਤ ਵਿੱਚ ਸੋਗ ਦੀ ਲਹਿਰ ਹੈ।
ਹੋਰ ਖਬਰਾਂ ਪੜ੍ਹਨ ਲਈ ਇੱਥੇ ਕਰੋ ਕਲਿੱਕ
ਖ਼ਬਰਾਂ ਦੇ ਅਪਡੇਟਸ ਲਈ LIVING INDIA NEWS 2 4/7 LIVE ਨਾਲ ਜੁੜੇ ਰਹੋ।