ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ : ਸਾਹਿਬਜ਼ਾਦਾ ਅਜੀਤ ਸਿੰਘ ਨਗਰ (ਮੋਹਾਲੀ) ਦੇ ਨਿਵਾਸੀਆਂ ਨੂੰ ਅੰਤਿਮ ਸਸਕਾਰ ਦੇ ਸਮੇਂ ਆ ਰਹੀਆਂ ਮੁਸ਼ਕਿਲਾਂ ਨੂੰ ਮੁੱਖ ਰੱਖਦਿਆਂ ਅੱਜ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਜੇ.ਆਰ.ਈ.ਡਬਲਯੂ (JREW) ਫਾਊਂਡੇਸ਼ਨ ਦੇ ਸਹਿਯੋਗ ਨਾਲ ਇੱਕ ਵਿਸ਼ੇਸ਼ ਪਹਿਲਕਦਮੀ ਕੀਤੀ ਗਈ ਹੈ। ਡਿਪਟੀ ਕਮਿਸ਼ਨਰ ਸ੍ਰੀਮਤੀ ਕੋਮਲ ਮਿੱਤਲ ਨੇ ਅੱਜ ਰਸਮੀ ਤੌਰ ‘ਤੇ ‘ਕਮਿਊਨਿਟੀ ਫਿਊਨਰਲ ਵੈਨ’ ਸੇਵਾ ਨੂੰ ਹਰੀ ਝੰਡੀ ਵਿਖਾ ਕੇ ਰਵਾਨਾ ਕੀਤਾ। ਇਹ ਵੈਨ ਵਿਸ਼ੇਸ਼ ਤੌਰ ‘ਤੇ ਬਲੌਂਗੀ ਸ਼ਮਸ਼ਾਨ ਘਾਟ ਵਿਖੇ ਤਾਇਨਾਤ ਕੀਤੀ ਜਾਵੇਗੀ।
ਸਨਮਾਨਜਨਕ ਅੰਤਿਮ ਵਿਦਾਈ ਲਈ ਵਡਮੁੱਲਾ ਉਪਰਾਲਾ* ਸਮਾਗਮ ਦੌਰਾਨ ਡਿਪਟੀ ਕਮਿਸ਼ਨਰ ਕੋਮਲ ਮਿੱਤਲ ਨੇ ਵੈਨ ਦੀ ਚਾਬੀ ਸ਼ਮਸ਼ਾਨ ਘਾਟ ਦੇ ਪੰਡਿਤ ਜੀ ਨੂੰ ਸੌਂਪੀ। ਇਸ ਮੌਕੇ ਉਨ੍ਹਾਂ ਜੇ.ਆਰ.ਈ.ਡਬਲਯੂ ਫਾਊਂਡੇਸ਼ਨ ਦੇ ਇਸ ਪਰਉਪਕਾਰੀ ਕਾਰਜ ਦੀ ਸ਼ਲਾਘਾ ਕਰਦਿਆਂ ਕਿਹਾ ਕਿ ਬਲੌਂਗੀ ਸ਼ਮਸ਼ਾਨ ਘਾਟ ਕੋਲ ਪਹਿਲਾਂ ਸਿਰਫ਼ ਛੋਟੀਆਂ ਗੱਡੀਆਂ ਦੀ ਸਹੂਲਤ ਸੀ, ਜਿਸ ਕਾਰਨ ਲੋਕਾਂ ਨੂੰ ਦਿੱਕਤ ਆਉਂਦੀ ਸੀ। ਹੁਣ ਇਸ ਵੱਡੀ ਫਿਊਨਰਲ ਵੈਨ ਦੇ ਆਉਣ ਨਾਲ ਮ੍ਰਿਤਕ ਦੇਹਾਂ ਨੂੰ ਪੂਰੇ ਸਨਮਾਨ ਨਾਲ ਅੰਤਿਮ ਸਥਾਨ ਤੱਕ ਪਹੁੰਚਾਇਆ ਜਾ ਸਕੇਗਾ।
ਨਾਮਾਤਰ ਫੀਸ ਅਤੇ ਵਿਸ਼ੇਸ਼ ਹੈਲਪਲਾਈਨ ਨੰਬਰ ਫਾਊਂਡੇਸ਼ਨ ਦੀ ਡਾਇਰੈਕਟਰ ਸ੍ਰੀਮਤੀ ਵਿਨੀਤਾ ਗਰੋਵਰ ਨੇ ਦੱਸਿਆ ਕਿ ਇਹ ਸੇਵਾ ਮੁਨਾਫ਼ਾ ਰਹਿਤ ਅਧਾਰ ‘ਤੇ ਚਲਾਈ ਜਾਵੇਗੀ। ਦੁਖੀ ਪਰਿਵਾਰਾਂ ‘ਤੇ ਆਰਥਿਕ ਬੋਝ ਨਾ ਪਵੇ, ਇਸ ਲਈ ਸਿਰਫ਼ 500 ਰੁਪਏ ਦੀ ਨਾਮਾਤਰ ਫੀਸ ਰੱਖੀ ਗਈ ਹੈ। ਫਾਊਂਡੇਸ਼ਨ ਨੇ ਇਸ ਸੇਵਾ ਲਈ ਇੱਕ ਸਮਰਪਿਤ ਹੈਲਪਲਾਈਨ ਨੰਬਰ ਵੀ ਜਾਰੀ ਕੀਤਾ ਹੈ। ਇਹ ਸਾਰਾ ਪ੍ਰਬੰਧ ਸਰਕਾਰੀ ਹਸਪਤਾਲ, ਫੇਜ਼-6 ਮੋਹਾਲੀ ਦੇ ਨਾਲ ਕੀਤੇ ਗਏ ਇੱਕ ਸਮਝੌਤੇ (MoU) ਤਹਿਤ ਚਲਾਇਆ ਜਾਵੇਗਾ।
सम्बंधित ख़बरें
ਸਮਾਜ ਸੇਵਾ ਵਿੱਚ ਫਾਊਂਡੇਸ਼ਨ ਦਾ ਯੋਗਦਾਨ ਵਿਨੀਤਾ ਗਰੋਵਰ ਨੇ ਅੱਗੇ ਦੱਸਿਆ ਕਿ ਜੇ.ਆਰ.ਈ.ਡਬਲਯੂ ਫਾਊਂਡੇਸ਼ਨ ਸਿਰਫ਼ ਸਿਹਤ ਹੀ ਨਹੀਂ, ਸਗੋਂ ਸਿੱਖਿਆ ਦੇ ਖੇਤਰ ਵਿੱਚ ਵੀ ਸਰਗਰਮ ਹੈ। ਫਾਊਂਡੇਸ਼ਨ ਵੱਲੋਂ ਬਲੌਂਗੀ ਦੇ ਸਰਕਾਰੀ ਸਕੂਲ ਨੂੰ ਗੋਦ ਲੈ ਕੇ ਉੱਥੇ ਲੜਕੀਆਂ ਲਈ ਪਖਾਨੇ, ਖੇਡ ਕਮਰੇ ਅਤੇ ਸਮਾਰਟ ਕਲਾਸ ਰੂਮਾਂ ਵਰਗੀਆਂ ਸਹੂਲਤਾਂ ਵਿਕਸਿਤ ਕੀਤੀਆਂ ਗਈਆਂ ਹਨ।
ਪਤਵੰਤੇ ਸੱਜਣਾਂ ਦੀ ਰਹੀ ਮੌਜੂਦਗੀ ਇਸ ਮੌਕੇ ਜੇ.ਆਰ.ਈ.ਡਬਲਯੂ ਇੰਜੀਨੀਅਰਿੰਗ ਲਿਮਿਟਿਡ ਦੇ ਚੇਅਰਮੈਨ ਸ੍ਰੀ ਰਾਮ ਰਤਨ ਅਗਰਵਾਲ, ਡਾਇਰੈਕਟਰ ਰੋਹਿਤ ਗਰੋਵਰ, ਰਾਘਵ ਗਰੋਵਰ ਅਤੇ ਰਾਜੀਵ ਚਾਵਲਾ ਸਮੇਤ ਕਈ ਸੀਨੀਅਰ ਅਧਿਕਾਰੀ ਹਾਜ਼ਰ ਸਨ।