ਗੁਰਦਾਸਪੁਰ : ਕਹਿੰਦੇ ਹਨ ਕਿ ਬਿਮਾਰੀ ਸਿਰਫ਼ ਸਰੀਰ ਨੂੰ ਹੀ ਨਹੀਂ, ਸਗੋਂ ਪੂਰੇ ਹੱਸਦੇ-ਵਸਦੇ ਪਰਿਵਾਰ ਨੂੰ ਵੀ ਖ਼ਤਮ ਕਰ ਦਿੰਦੀ ਹੈ। ਅਜਿਹਾ ਹੀ ਕੁਝ ਵਾਪਰਿਆ ਹੈ ਧਿਆਨਪੁਰ ਦੇ ਰਹਿਣ ਵਾਲੇ 40 ਸਾਲਾ ਸੰਦੀਪ ਦੇ ਨਾਲ। ਕਦੇ ਗੋਲਗੱਪਿਆਂ ਦੀ ਰੇਹੜੀ ਲਗਾ ਕੇ ਆਪਣੇ ਬੱਚਿਆਂ ਦਾ ਪੇਟ ਪਾਲਣ ਵਾਲਾ ਸੰਦੀਪ ਅੱਜ ਖ਼ੁਦ ਕੈਂਸਰ ਵਰਗੀ ਨਾਮੁਰਾਦ ਬਿਮਾਰੀ ਕਾਰਨ ਮੰਜੇ ‘ਤੇ ਪਿਆ ਮੌਤ ਤੇ ਜ਼ਿੰਦਗੀ ਦੀ ਜੰਗ ਲੜ ਰਿਹਾ ਹੈ।
ਰੇਹੜੀ ਚਲਾ ਕੇ ਪਾਲਦਾ ਸੀ ਪਰਿਵਾਰ
ਸੰਦੀਪ ਆਪਣੇ ਦੋ ਧੀਆਂ, ਇੱਕ ਪੁੱਤਰ, ਪਤਨੀ ਅਤੇ ਬਜ਼ੁਰਗ ਮਾਪਿਆਂ ਦਾ ਇੱਕੋ-ਇੱਕ ਸਹਾਰਾ ਸੀ। ਜਦੋਂ ਤੱਕ ਉਹ ਤੰਦਰੁਸਤ ਸੀ, ਮਿਹਨਤ-ਮਜ਼ਦੂਰੀ ਕਰਕੇ ਪਰਿਵਾਰ ਦਾ ਗੁਜ਼ਾਰਾ ਬਹੁਤ ਵਧੀਆ ਕਰ ਰਿਹਾ ਸੀ। ਪਰ ਲਗਭਗ ਇੱਕ ਸਾਲ ਪਹਿਲਾਂ ਲੱਗੀ ਬਿਮਾਰੀ ਨੇ ਹੌਲੀ-ਹੌਲੀ ਭਿਆਨਕ ਕੈਂਸਰ ਦਾ ਰੂਪ ਧਾਰ ਲਿਆ। ਪਰਿਵਾਰ ਨੇ ਉਸ ਨੂੰ ਬਚਾਉਣ ਲਈ ਆਪਣੀ ਸਾਰੀ ਜਮ੍ਹਾਂ-ਪੂੰਜੀ ਖ਼ਰਚ ਕਰ ਦਿੱਤੀ, ਘਰ ਦਾ ਕੀਮਤੀ ਸਾਮਾਨ ਤੱਕ ਵੇਚ ਦਿੱਤਾ, ਪਰ ਹੁਣ ਹਾਲਾਤ ਇਹ ਹਨ ਕਿ ਇਲਾਜ ਲਈ ਪੈਸੇ ਤਾਂ ਦੂਰ, ਘਰ ਵਿੱਚ ਰੋਟੀ ਦੇ ਲਾਲੇ ਪੈ ਗਏ ਹਨ।
ਬਜ਼ੁਰਗ ਪਿਓ ਲਗਾ ਰਿਹਾ ਦਿਹਾੜੀਆਂ, ਮਾਂ ਦੀਆਂ ਅੱਖਾਂ ਦੇ ਹੰਝੂ ਨਹੀਂ ਸੁੱਕ ਰਹੇ
ਇਸ ਦੁੱਖ ਦੀ ਘੜੀ ਵਿੱਚ ਸੰਦੀਪ ਦੇ ਬਜ਼ੁਰਗ ਪਿਤਾ ਨੂੰ ਇਸ ਉਮਰ ਵਿੱਚ ਵੀ ਘਰ ਦਾ ਚੁੱਲ੍ਹਾ ਬਾਲਣ ਲਈ ਦਿਹਾੜੀ-ਮਜ਼ਦੂਰੀ ਕਰਨੀ ਪੈ ਰਹੀ ਹੈ। ਦੂਜੇ ਪਾਸੇ, ਬਜ਼ੁਰਗ ਮਾਂ ਆਪਣੇ ਜਵਾਨ ਪੁੱਤਰ ਨੂੰ ਮੰਜੇ ‘ਤੇ ਤੜਫਦਾ ਦੇਖ ਕੇ ਰੋ-ਰੋ ਕੇ ਬੇਹਾਲ ਹੈ। ਪਰਿਵਾਰ ਦੀਆਂ ਅੱਖਾਂ ਹਰ ਵੇਲੇ ਬੂਹੇ ਵੱਲ ਲੱਗੀਆਂ ਰਹਿੰਦੀਆਂ ਹਨ ਕਿ ਸ਼ਾਇਦ ਕੋਈ ਦਾਨੀ ਸੱਜਣ ਜਾਂ ‘ਫ਼ਰਿਸ਼ਤਾ’ ਬਣ ਕੇ ਆਏਗਾ, ਜੋ ਉਨ੍ਹਾਂ ਦੇ ਪੁੱਤਰ ਦਾ ਇਲਾਜ ਕਰਵਾ ਕੇ ਉਸ ਨੂੰ ਮੁੜ ਪੈਰਾਂ ‘ਤੇ ਖੜ੍ਹਾ ਕਰ ਦੇਵੇਗਾ।
सम्बंधित ख़बरें
ਮਦਦ ਦੀ ਗੁਹਾਰ: ਕੀ ਸਰਕਾਰ ਜਾਂ ਸਮਾਜ ਸੇਵੀ ਸੰਸਥਾਵਾਂ ਸੁਣਨਗੀਆਂ ਆਵਾਜ਼?
ਸੰਦੀਪ ਦੀ ਪਤਨੀ ਅਤੇ ਬੱਚਿਆਂ ਦਾ ਬੁਰਾ ਹਾਲ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਜੇਕਰ ਸੰਦੀਪ ਦਾ ਇਲਾਜ ਹੋ ਜਾਵੇ ਤਾਂ ਉਹ ਫਿਰ ਤੋਂ ਆਪਣੇ ਪਰਿਵਾਰ ਨੂੰ ਪਾਲ ਸਕੇਗਾ। ਪਰਿਵਾਰ ਨੇ ਸਰਕਾਰ, ਪ੍ਰਸ਼ਾਸਨ ਅਤੇ ਦੇਸ਼-ਵਿਦੇਸ਼ ਵਿੱਚ ਬੈਠੀਆਂ ਸਮਾਜ ਸੇਵੀ ਸੰਸਥਾਵਾਂ ਨੂੰ ਅਪੀਲ ਕੀਤੀ ਹੈ ਕਿ ਇਸ ਔਖੀ ਘੜੀ ਵਿੱਚ ਉਨ੍ਹਾਂ ਦੀ ਮਦਦ ਕੀਤੀ ਜਾਵੇ ਤਾਂ ਜੋ ਤਿੰਨ ਮਾਸੂਮ ਬੱਚਿਆਂ ਦੇ ਸਿਰ ‘ਤੇ ਪਿਤਾ ਦਾ ਸਾਇਆ ਬਣਿਆ ਰਹੇ।