ਔਨਲਾਈਨ ਡੈਸਕ/ਲਿਵਿੰਗ ਇੰਡੀਆ ਨਿਊਜ਼:- ਉੱਤਰ ਭਾਰਤ ਵਿੱਚ ਠੰਡ ਦਾ ਕਹਿਰ ਨਿਰੰਤਰ ਵੱਧਦਾ ਜਾ ਰਿਹਾ ਹੈ। ਪਹਾੜਾਂ ਵਿੱਚ ਬਰਫ਼ਬਾਰੀ ਅਤੇ ਮੈਦਾਨਾਂ ਵਿੱਚ ਠੰਡ ਦੀ ਲਹਿਰ ਨੇ ਨਵੇਂ ਸਾਲ ਦਾ ਸਵਾਗਤ ਕੀਤਾ। ਪੰਜਾਬ ਵਿੱਚ ਬੁੱਧਵਾਰ ਨੂੰ ਲੁਧਿਆਣਾ ਸਭ ਤੋਂ ਠੰਡਾ ਰਿਹਾ। ਘੱਟੋ ਘੱਟ ਤਾਪਮਾਨ 0.3 ਡਿਗਰੀ ਦਰਜ ਕੀਤਾ ਗਿਆ। ਇਸ ਤੋਂ ਬਾਅਦ ਜਲੰਧਰ ਦੇ ਆਦਮਪੁਰ ਵਿੱਚ 0.4 ਡਿਗਰੀ ਤਾਪਮਾਨ ਰਿਹਾ। ਬਠਿੰਡਾ ਵਿੱਚ ਪਾਰਾ 0.5 ਡਿਗਰੀ ‘ਤੇ ਪਹੁੰਚਿਆ ਹੈ।
ਬਠਿੰਡਾ ਵਿੱਚ ਠੰਡ ਨੇ ਪਿਛਲੇ 47 ਸਾਲਾਂ ਦਾ ਰਿਕਾਰਡ ਤੋੜਿਆ ਹੈ। ਇਸ ਤੋਂ ਪਹਿਲਾਂ ਸਾਲ 1973 ਵਿੱਚ, ਬਹੁਤ ਜ਼ਿਆਦਾ ਠੰਡ ਪਈ ਸੀ। ਕੁਝ ਅਜਿਹੇ ਖੇਤਰ ਵੀ ਹਨ, ਜਿੱਥੇ ਪਾਈਪਾਂ ‘ਚ ਪਾਣੀ ਵੀ ਜੰਮ ਜਾਂਦਾ ਹੈ, ਜਿਸ ਨਾਲ ਸਪਲਾਈ ਵਿੱਚ ਵਿਘਨ ਪੈਂਦਾ ਹੈ। ਪਿਛਲੇ ਦਿਨੀ ਮੁਕਤਸਰ ਵਿੱਚ ਤਾਪਮਾਨ 2 ਡਿਗਰੀ ਰਿਹਾ। ਇੱਥੇ 20 ਸਾਲਾਂ ਬਾਅਦ ਇੰਨੀ ਠੰਡੀ ਰਾਤ ਸੀ। ਮੌਸਮ ਵਿਭਾਗ ਦੇ ਇਕ ਅਧਿਕਾਰੀ ਨੇ ਕਿਹਾ ਕਿ, 7 ਜਨਵਰੀ ਤੱਕ ਪੰਜਾਬ ਵਿੱਚ ਇਸੇ ਤਰ੍ਹਾਂ ਠੰਡਾ ਰਹਿਣ ਦੀ ਸੰਭਾਵਨਾ ਹੈ।
ਭਾਰੀ ਠੰਡ ਕਾਰਨ ਇੱਕ ਦੀ ਮੌਤ
ਪਿਛਲੇ 15 ਦਿਨਾਂ ਤੋਂ ਪੈ ਰਹੀ ਕੜਾਕੇ ਦੀ ਠੰਡ ਹੁਣ ਫੁਲ ਮੋਡ ‘ਤੇ ਪਹੁੰਚ ਚੁੱਕੀ ਹੈ। ਪਿਛਲੇ ਦੋ ਦਿਨਾਂ ਵਿੱਚ ਦੋ ਲੋਕਾਂ ਦੀ ਮੌਤ ਠੰਡ ਕਾਰਨ ਹੋਈ ਹੈ। ਮੰਗਲਵਾਰ ਨੂੰ, ਨਵੇਂ ਸਾਲ ‘ਤੇ, ਰਾਤ ਨੂੰ, ਲੋਕ ਜਸ਼ਨਾਂ ਵਿੱਚ ਰੁੱਝੇ ਹੋਏ ਸਨ। ਉਸੇ ਸਮੇਂ ਪੁਰਾਣੇ ਫਾਜ਼ਿਲਕਾ ਰੋਡ ਸੰਤ ਨਗਰ ਨੇੜੇ ਠੰਡ ਕਾਰਨ ਇਕ ਬਜ਼ੁਰਗ ਵਿਅਕਤੀ ਦੀ ਮੌਤ ਹੋ ਗਈ। ਘਟਨਾ ਦੀ ਜਾਣਕਾਰੀ ਮਿਲਣ ‘ਤੇ ਥਾਣਾ ਨੰਬਰ 1 ਦੀ ਪੁਲਿਸ ਨੇ ਮ੍ਰਿਤਕ ਦੇਹ ਨੂੰ ਪਹਿਚਾਣ ਅਤੇ ਪੋਸਟ ਮਾਰਟਮ ਲਈ ਹਸਪਤਾਲ ਦੇ ਮੋਰਚਰੀ ‘ਚ ਰਖਵਾ ਦਿੱਤਾ ਹੈ।