ਮੁੰਬਈ : ਭਾਰਤੀ ਸੰਗੀਤ ਜਗਤ ਦੀ ਮਹਾਨ ਗਾਇਕਾ ਆਸ਼ਾ ਭੋਸਲੇ ਐਤਵਾਰ, 12 ਅਪ੍ਰੈਲ ਨੂੰ ਮੁੰਬਈ ਵਿਖੇ ਅਕਾਲ ਚਲਾਣਾ ਕਰ ਗਏ। ਉਨ੍ਹਾਂ ਦੀ ਪੋਤੀ ਜਨਾਈ ਭੋਸਲੇ ਨੇ ਦੱਸਿਆ ਕਿ ਛਾਤੀ ਵਿੱਚ ਇਨਫੈਕਸ਼ਨ ਅਤੇ ਜ਼ਿਆਦਾ ਥਕਾਵਟ ਕਾਰਨ ਉਨ੍ਹਾਂ ਨੂੰ ਹਸਪਤਾਲ ਦਾਖਲ ਕਰਵਾਇਆ ਗਿਆ ਸੀ। ਆਸ਼ਾ ਜੀ ਸੋਸ਼ਲ ਮੀਡੀਆ ‘ਤੇ ਕਾਫ਼ੀ ਸਰਗਰਮ ਰਹਿੰਦੇ ਸਨ ਅਤੇ ਉਨ੍ਹਾਂ ਦੀ ਆਖ਼ਰੀ ਪੋਸਟ ਉਨ੍ਹਾਂ ਦੀ ਜ਼ਿੰਦਗੀ ਦੇ ਡੂੰਘੇ ਫ਼ਲਸਫ਼ੇ ਨੂੰ ਬਿਆਨ ਕਰਦੀ ਹੈ।
ਆਖ਼ਰੀ ਪੋਸਟ: ਜ਼ਿੰਦਗੀ ਦੇ ਸਫ਼ਰ ਅਤੇ ਅਧਿਆਤਮ ਦਾ ਸੰਗਮ
ਆਸ਼ਾ ਭੋਸਲੇ ਦੀ ਅੰਤਿਮ ਇੰਸਟਾਗ੍ਰਾਮ ਪੋਸਟ ਮਸ਼ਹੂਰ ਬੈਂਡ ‘ਗੋਰਿਲਾਜ਼’ (Gorillaz) ਨਾਲ ਇੱਕ ਖ਼ਾਸ ਕੋਲੈਬੋਰੇਸ਼ਨ ਸੀ। ਇਸ ਵਿੱਚ ਉਨ੍ਹਾਂ ਨੇ ‘ਦਿ ਸ਼ੈਡੋ ਲਾਈਟ’ ਟਰੈਕ ਰਾਹੀਂ ਆਪਣੇ ਸੰਗੀਤਕ ਸਫ਼ਰ ਅਤੇ ਜੀਵਨ ਦੇ ਉਦੇਸ਼ ਨੂੰ ਸਾਂਝਾ ਕੀਤਾ ਸੀ। ਉਨ੍ਹਾਂ ਨੇ ਵਾਰਾਣਸੀ ਦੀ ਯਾਤਰਾ ਅਤੇ ਪਵਿੱਤਰ ਗੰਗਾ ਨਦੀ ਦਾ ਜ਼ਿਕਰ ਕਰਦਿਆਂ ਲਿਖਿਆ ਸੀ ਕਿ ਇਸ ਯਾਤਰਾ ਨੇ ਉਨ੍ਹਾਂ ਨੂੰ ਧਰਤੀ ‘ਤੇ ਆਪਣੀ ਭੂਮਿਕਾ ਸਮਝਣ ਵਿੱਚ ਮਦਦ ਕੀਤੀ। ਉਨ੍ਹਾਂ ਮੁਤਾਬਕ ਇਹ ਗੀਤ ਉਨ੍ਹਾਂ ਦੇ ਜਨਮ, ਰਿਸ਼ਤਿਆਂ, ਇੱਕ ਧੀ, ਮਾਂ, ਭੈਣ ਅਤੇ ਪਤਨੀ ਵਜੋਂ ਨਿਭਾਏ ਗਏ ਫ਼ਰਜ਼ਾਂ ਦਾ ਪ੍ਰਤੀਕ ਸੀ।
ਸਾਂਝੀਵਾਲਤਾ ਦਾ ਸੰਦੇਸ਼: ਰਮਜ਼ਾਨ ਦੀ ਦਿੱਤੀ ਸੀ ਮੁਬਾਰਕਬਾਦ
View this post on Instagram
ਆਪਣੇ ਦਿਹਾਂਤ ਤੋਂ ਕੁਝ ਦਿਨ ਪਹਿਲਾਂ ਆਸ਼ਾ ਜੀ ਨੇ ਸਾਂਝੀਵਾਲਤਾ ਦੀ ਮਿਸਾਲ ਪੇਸ਼ ਕਰਦਿਆਂ ਆਪਣੇ ਪ੍ਰਸ਼ੰਸਕਾਂ ਨੂੰ ਰਮਜ਼ਾਨ ਦੇ ਪਵਿੱਤਰ ਮਹੀਨੇ ਦੀ ਵਧਾਈ ਦਿੱਤੀ ਸੀ। ਉਨ੍ਹਾਂ ਨੇ ਲਿਖਿਆ ਸੀ, “ਦੁਆ ਹੈ ਕਿ ਇਹ ਪਵਿੱਤਰ ਮਹੀਨਾ ਤੁਹਾਡੇ ਦਿਲਾਂ ਵਿੱਚ ਸਕੂਨ ਅਤੇ ਘਰਾਂ ਵਿੱਚ ਆਪਣਾਪਨ ਲੈ ਕੇ ਆਵੇ।” ਉਨ੍ਹਾਂ ਦੇ ਇਹ ਸ਼ਬਦ ਹੁਣ ਉਨ੍ਹਾਂ ਦੇ ਚਾਹੁਣ ਵਾਲਿਆਂ ਲਈ ਇੱਕ ਯਾਦਗਾਰੀ ਸੁਨੇਹਾ ਬਣ ਗਏ ਹਨ।
ਅੰਤਿਮ ਸੰਸਕਾਰ: ਸ਼ਿਵਾਜੀ ਪਾਰਕ ਵਿਖੇ ਦਿੱਤੀ ਜਾਵੇਗੀ ਅੰਤਿਮ ਵਿਦਾਈ
ਆਸ਼ਾ ਭੋਸਲੇ ਦੇ ਬੇਟੇ ਆਨੰਦ ਭੋਸਲੇ ਨੇ ਦੱਸਿਆ ਕਿ ਜੋ ਲੋਕ ਗਾਇਕਾ ਨੂੰ ਸ਼ਰਧਾਂਜਲੀ ਭੇਟ ਕਰਨਾ ਚਾਹੁੰਦੇ ਹਨ, ਉਹ ਸੋਮਵਾਰ ਸਵੇਰੇ 11 ਵਜੇ ਉਨ੍ਹਾਂ ਦੀ ਰਿਹਾਇਸ਼ ‘ਕਾਸਾ ਗ੍ਰਾਂਡੇ’ (ਲੋਅਰ ਪਰੇਲ) ਵਿਖੇ ਪਹੁੰਚ ਸਕਦੇ ਹਨ। ਆਸ਼ਾ ਜੀ ਦਾ ਅੰਤਿਮ ਸੰਸਕਾਰ ਕੱਲ੍ਹ ਸ਼ਾਮ 4 ਵਜੇ ਮੁੰਬਈ ਦੇ ਇਤਿਹਾਸਕ ਸ਼ਿਵਾਜੀ ਪਾਰਕ ਵਿਖੇ ਪੂਰੇ ਸਰਕਾਰੀ ਸਨਮਾਨਾਂ ਨਾਲ ਕੀਤਾ ਜਾਵੇਗਾ।