ਫਰੀਦਾਬਾਦ: ਹਰਿਆਣਾ ਦੇ ਫਰੀਦਾਬਾਦ ਦੇ ਸੈਕਟਰ-24 ਸਥਿਤ ਇੱਕ ਮੈਟਲ ਸ਼ੀਟ ਕਟਿੰਗ ਫੈਕਟਰੀ ਵਿੱਚ ਵਾਪਰੇ ਭਿਆਨਕ ਅੱਗ ਕਾਂਡ ਨੇ ਪੂਰੇ ਇਲਾਕੇ ਨੂੰ ਹਿਲਾ ਕੇ ਰੱਖ ਦਿੱਤਾ ਹੈ। ਇਸ ਹਾਦਸੇ ਵਿੱਚ ਹੁਣ ਤੱਕ 42 ਲੋਕਾਂ ਦੇ ਝੁਲਸਣ ਦੀ ਖ਼ਬਰ ਹੈ, ਜਿਨ੍ਹਾਂ ਵਿੱਚੋਂ 8 ਗੰਭੀਰ ਜ਼ਖ਼ਮੀਆਂ ਨੂੰ ਦੇਰ ਰਾਤ ਦਿੱਲੀ ਪੁਲਿਸ ਦੀ ਮਦਦ ਨਾਲ ‘Green Corridor’ ਬਣਾ ਕੇ ਦਿੱਲੀ ਦੇ AIIMS ਅਤੇ ਸਫਦਰਜੰਗ ਹਸਪਤਾਲ ਵਿੱਚ ਭਰਤੀ ਕਰਵਾਇਆ ਗਿਆ ਹੈ। ਬਾਕੀ ਜ਼ਖ਼ਮੀਆਂ ਦਾ ਇਲਾਜ ਫਰੀਦਾਬਾਦ ਦੇ ਸਰਕਾਰੀ ਅਤੇ ਨਿੱਜੀ ਹਸਪਤਾਲਾਂ ਵਿੱਚ ਜਾਰੀ ਹੈ।
ਕਿਵੇਂ ਵਾਪਰਿਆ ਹਾਦਸਾ
ਜਾਣਕਾਰੀ ਅਨੁਸਾਰ ਸੋਮਵਾਰ ਸ਼ਾਮ ਕਰੀਬ 4:30 ਵਜੇ ਫੈਕਟਰੀ ਵਿੱਚ ਸੀਐਨਸੀ (CNC) ਮਸ਼ੀਨ ਤੋਂ ਨਿਕਲੀ ਇੱਕ ਮਾਮੂਲੀ ਚਿੰਗਾਰੀ ਨੇ ਕੈਮੀਕਲ ਨਾਲ ਭਰੇ ਡਰੱਮਾਂ ਨੂੰ ਅੱਗ ਲਗਾ ਦਿੱਤੀ। ਵੇਖਦੇ ਹੀ ਵੇਖਦੇ ਅੱਗ ਨੇ ਵਿਕਰਾਲ ਰੂਪ ਧਾਰਨ ਕਰ ਲਿਆ ਅਤੇ ਕੈਮੀਕਲ ਦੇ ਡਰੱਮ ਇੱਕ-ਇੱਕ ਕਰਕੇ ਫਟਣ ਲੱਗੇ। ਇਹ ਕੈਮੀਕਲ ਮੈਟਲ ਸ਼ੀਟ ਦੀ ਕਟਾਈ ਦੌਰਾਨ ਵਰਤਿਆ ਜਾਂਦਾ ਸੀ, ਜਿਸ ਨੇ ਅੱਗ ਨੂੰ ਹੋਰ ਭੜਕਾ ਦਿੱਤਾ।
ਤਮਾਸ਼ਬੀਨ ਵੀ ਬਣੇ ਹਾਦਸੇ ਦਾ ਸ਼ਿਕਾਰ
ਹਾਦਸੇ ਦਾ ਇੱਕ ਖੌਫ਼ਨਾਕ ਵੀਡੀਓ ਵੀ ਸਾਹਮਣੇ ਆਇਆ ਹੈ, ਜਿਸ ਵਿੱਚ ਫੈਕਟਰੀ ਦੇ ਬਾਹਰ ਪਏ ਡਰੱਮਾਂ ਵਿੱਚ ਜ਼ੋਰਦਾਰ ਧਮਾਕੇ ਹੁੰਦੇ ਦਿਖਾਈ ਦੇ ਰਹੇ ਹਨ। ਅੱਗ ਦਾ ਗੁਬਾਰ ਕਰੀਬ 50 ਮੀਟਰ ਦੀ ਉਚਾਈ ਤੱਕ ਉੱਠ ਰਿਹਾ ਸੀ। ਦੁਖਦਾਈ ਗੱਲ ਇਹ ਰਹੀ ਕਿ ਅੱਗ ਲੱਗਣ ਤੋਂ ਬਾਅਦ ਜਿਹੜੇ ਮਜ਼ਦੂਰ ਅਤੇ ਰਾਹਗੀਰ ਬਾਹਰ ਖੜ੍ਹੇ ਹੋ ਕੇ ਵੀਡੀਓ ਬਣਾ ਰਹੇ ਸਨ ਜਾਂ ਤਮਾਸ਼ਾ ਦੇਖ ਰਹੇ ਸਨ, ਉਹ ਵੀ ਧਮਾਕਿਆਂ ਦੀ ਲਪੇਟ ਵਿੱਚ ਆ ਗਏ।
ਪੁਲਿਸ ਅਤੇ ਫਾਇਰ ਬ੍ਰਿਗੇਡ ਮੁਲਾਜ਼ਮ ਵੀ ਝੁਲਸੇ
ਬਚਾਅ ਕਾਰਜਾਂ ਦੌਰਾਨ 3 ਪੁਲਿਸ ਕਰਮਚਾਰੀ ਅਤੇ 2 ਫਾਇਰ ਬ੍ਰਿਗੇਡ ਮੁਲਾਜ਼ਮ ਵੀ ਗੰਭੀਰ ਰੂਪ ਵਿੱਚ ਝੁਲਸ ਗਏ ਹਨ। ਦੱਸਿਆ ਜਾ ਰਿਹਾ ਹੈ ਕਿ ਜਦੋਂ ਫੋਰਸ ਬਚਾਅ ਕਾਰਜ ਕਰ ਰਹੀ ਸੀ, ਤਾਂ ਅਚਾਨਕ ਇੱਕ ਡਰੱਮ ਵਿੱਚ ਜ਼ੋਰਦਾਰ ਬਲਾਸਟ ਹੋਇਆ। ਜ਼ਖ਼ਮੀਆਂ ਵਿੱਚ ਐਸਪੀਓ ਅਭਿਸ਼ੇਕ ਅਤੇ ਕਾਂਸਟੇਬਲ ਅਜਨੇਸ਼ ਸਮੇਤ ਪੰਜ ਪੁਲਿਸ ਮੁਲਾਜ਼ਮ ਸ਼ਾਮਲ ਹਨ।
ਵਾਹਨ ਸੜ ਕੇ ਸੁਆਹ, ਇਲਾਕੇ ਵਿੱਚ ਮਚੀ ਭਗਦੜ
ਧਮਾਕੇ ਇੰਨੇ ਜ਼ਬਰਦਸਤ ਸਨ ਕਿ ਫੈਕਟਰੀ ਦੇ ਬਾਹਰ ਖੜ੍ਹੀਆਂ ਦਰਜਨਾਂ ਕਾਰਾਂ ਅਤੇ ਬਾਈਕ ਪੂਰੀ ਤਰ੍ਹਾਂ ਸੜ ਕੇ ਸੁਆਹ ਹੋ ਗਈਆਂ। ਲਗਾਤਾਰ ਹੋ ਰਹੇ ਧਮਾਕਿਆਂ ਕਾਰਨ ਇਲਾਕੇ ਵਿੱਚ ਦਹਿਸ਼ਤ ਦਾ ਮਾਹੌਲ ਬਣ ਗਿਆ ਅਤੇ ਪੁਲਿਸ ਨੇ ਸੁਰੱਖਿਆ ਦੇ ਮੱਦੇਨਜ਼ਰ ਆਲੇ-ਦੁਆਲੇ ਦੀਆਂ ਫੈਕਟਰੀਆਂ ਅਤੇ ਰਿਹਾਇਸ਼ੀ ਇਲਾਕੇ ਨੂੰ ਖਾਲੀ ਕਰਵਾ ਲਿਆ।
ਹੋਰ ਖਬਰਾਂ ਪੜ੍ਹਨ ਲਈ ਇੱਥੇ ਕਰੋ ਕਲਿੱਕ
ਖ਼ਬਰਾਂ ਦੇ ਅਪਡੇਟਸ ਲਈ LIVING INDIA NEWS 2 4/7 LIVE ਨਾਲ ਜੁੜੇ ਰਹੋ।