ਵਾਸ਼ਿੰਗਟਨ: ਅਮਰੀਕੀ ਰਾਸ਼ਟਰਪਤੀ Donald Trump ਦੇ ਸਵਿਟਜ਼ਰਲੈਂਡ ਦੌਰੇ ਦੌਰਾਨ ਉਸ ਵੇਲੇ ਹੜਕੰਪ ਮਚ ਗਿਆ ਜਦੋਂ ਉਨ੍ਹਾਂ ਦੇ ਅਧਿਕਾਰਤ ਜਹਾਜ਼ ‘ਏਅਰ ਫੋਰਸ ਵਨ’ ਵਿੱਚ ਉਡਾਣ ਭਰਨ ਦੇ ਕੁਝ ਸਮੇਂ ਬਾਅਦ ਹੀ ਤਕਨੀਕੀ ਖਰਾਬੀ ਆ ਗਈ। ਮੰਗਲਵਾਰ ਸ਼ਾਮ ਨੂੰ ਜਹਾਜ਼ ਨੇ ਜੁਆਇੰਟ ਬੇਸ ਐਂਡਰਿਊਜ਼ ਤੋਂ ਉਡਾਣ ਭਰੀ ਸੀ, ਪਰ ਕਰੀਬ ਇੱਕ ਘੰਟੇ ਬਾਅਦ ਇਸ ਨੂੰ ਵਾਪਸ ਪਰਤਣਾ ਪਿਆ। ਵ੍ਹਾਈਟ ਹਾਊਸ ਦੀ ਪ੍ਰੈੱਸ ਸਕੱਤਰ ਕੈਰੋਲਿਨ ਲੀਵਿਟ ਨੇ ਦੱਸਿਆ ਕਿ ਜਹਾਜ਼ ਵਿੱਚ ਮਾਮੂਲੀ ਬਿਜਲੀ ਸਬੰਧੀ ਨੁਕਸ (Electrical Technical Issue) ਪਾਇਆ ਗਿਆ ਸੀ, ਜਿਸ ਕਾਰਨ ਇਹ ਸਾਵਧਾਨੀ ਵਜੋਂ ਵਾਪਸ ਮੁੜਿਆ।
ਉਡਾਣ ਦੌਰਾਨ ਬੰਦ ਹੋ ਗਈਆਂ ਸਨ ਲਾਈਟਾਂ
ਜਹਾਜ਼ ਵਿੱਚ ਮੌਜੂਦ ਇੱਕ ਪੱਤਰਕਾਰ ਅਨੁਸਾਰ, ਟੇਕ-ਆਫ ਤੋਂ ਕੁਝ ਦੇਰ ਬਾਅਦ ਪ੍ਰੈੱਸ ਕੈਬਿਨ ਦੀਆਂ ਲਾਈਟਾਂ ਕੁਝ ਸਮੇਂ ਲਈ ਬੰਦ ਹੋ ਗਈਆਂ ਸਨ। ਹਾਲਾਂਕਿ ਸ਼ੁਰੂ ਵਿੱਚ ਇਸ ਦਾ ਕੋਈ ਅਧਿਕਾਰਤ ਕਾਰਨ ਨਹੀਂ ਦੱਸਿਆ ਗਿਆ ਸੀ, ਪਰ ਅੱਧੇ ਘੰਟੇ ਬਾਅਦ ਐਲਾਨ ਕੀਤਾ ਗਿਆ ਕਿ ਜਹਾਜ਼ ਵਾਸ਼ਿੰਗਟਨ ਡੀ.ਸੀ. ਖੇਤਰ ਵਿੱਚ ਵਾਪਸ ਉਤਰੇਗਾ। ਜਹਾਜ਼ ਦੀ ਸੁਰੱਖਿਅਤ ਲੈਂਡਿੰਗ ਤੋਂ ਬਾਅਦ ਰਾਸ਼ਟਰਪਤੀ ਅਤੇ ਉਨ੍ਹਾਂ ਦਾ ਵਫ਼ਦ ਬੈਕਅੱਪ ਜਹਾਜ਼ ਰਾਹੀਂ ਸਵਿਟਜ਼ਰਲੈਂਡ ਦੇ ਦਾਵੋਸ ਲਈ ਰਵਾਨਾ ਹੋਇਆ।
ਵਰਲਡ ਇਕਨਾਮਿਕ ਫੋਰਮ (WEF) ਵਿੱਚ ਸ਼ਮੂਲੀਅਤ
ਦੂਜੀ ਵਾਰ ਰਾਸ਼ਟਰਪਤੀ ਦਾ ਅਹੁਦਾ ਸੰਭਾਲਣ ਤੋਂ ਬਾਅਦ ਇਹ Donald Trump ਦੀ ਵਰਲਡ ਇਕਨਾਮਿਕ ਫੋਰਮ ਵਿੱਚ ਪਹਿਲੀ ਹਾਜ਼ਰੀ ਹੈ। ਦਾਵੋਸ ਜਾਣ ਤੋਂ ਪਹਿਲਾਂ ਉਨ੍ਹਾਂ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਅਮਰੀਕੀ ਆਰਥਿਕਤਾ ਦੀ ਮਜ਼ਬੂਤੀ ਅਤੇ ਘੱਟ ਗੈਸ ਕੀਮਤਾਂ ਦਾ ਜ਼ਿਕਰ ਕੀਤਾ। ਦਾਵੋਸ ਵਿੱਚ ਹੋ ਰਹੀ ਇਸ 56ਵੀਂ ਸਾਲਾਨਾ ਬੈਠਕ ਵਿੱਚ ਦੁਨੀਆ ਭਰ ਦੇ 130 ਦੇਸ਼ਾਂ ਦੇ ਕਰੀਬ 3,000 ਗਲੋਬਲ ਆਗੂ ਹਿੱਸਾ ਲੈ ਰਹੇ ਹਨ, ਜਿੱਥੇ ਟਰੰਪ ਅੱਜ ਅਮਰੀਕੀ ਨੀਤੀਆਂ ‘ਤੇ ਆਪਣਾ ਸੰਬੋਧਨ ਦੇਣਗੇ।
सम्बंधित ख़बरें
ਪੁਰਾਣੇ ਹੋ ਰਹੇ ਹਨ ਏਅਰ ਫੋਰਸ ਵਨ ਜਹਾਜ਼
ਮੌਜੂਦਾ ਸਮੇਂ ਵਿੱਚ ਵਰਤੇ ਜਾ ਰਹੇ ‘ਏਅਰ ਫੋਰਸ ਵਨ’ ਦੇ ਦੋਵੇਂ ਜਹਾਜ਼ ਕਰੀਬ ਚਾਰ ਦਹਾਕੇ ਪੁਰਾਣੇ ਹਨ। ਹਾਲਾਂਕਿ ਬੋਇੰਗ ਕੰਪਨੀ ਵੱਲੋਂ ਨਵੇਂ ਜਹਾਜ਼ ਤਿਆਰ ਕੀਤੇ ਜਾ ਰਹੇ ਹਨ, ਪਰ ਉਸ ਪ੍ਰੋਜੈਕਟ ਵਿੱਚ ਲਗਾਤਾਰ ਦੇਰੀ ਹੋ ਰਹੀ ਹੈ। ਇਹ ਜਹਾਜ਼ ਐਂਟੀ-ਮਿਜ਼ਾਈਲ ਸਿਸਟਮ ਅਤੇ ਉੱਨਤ ਸੰਚਾਰ ਸਹੂਲਤਾਂ ਨਾਲ ਲੈਸ ਹੁੰਦੇ ਹਨ। ਇਸ ਦੌਰਾਨ ਪ੍ਰੈੱਸ ਸਕੱਤਰ ਲੀਵਿਟ ਨੇ ਮਜ਼ਾਕੀਆ ਲਹਿਜ਼ੇ ਵਿੱਚ ਕਿਹਾ ਕਿ ਕਤਰ ਦੇ ਸ਼ਾਹੀ ਪਰਿਵਾਰ ਵੱਲੋਂ ਤੋਹਫ਼ੇ ਵਜੋਂ ਦਿੱਤਾ ਗਿਆ ‘ਬੋਇੰਗ 747-8 ਜੰਬੋ ਜੈੱਟ’ ਇਸ ਸਮੇਂ ਇੱਕ ਬਿਹਤਰ ਵਿਕਲਪ ਜਾਪ ਰਿਹਾ ਹੈ, ਜਿਸ ਨੂੰ ਸੁਰੱਖਿਆ ਮਾਪਦੰਡਾਂ ਅਨੁਸਾਰ ਬਦਲਣ ਦੀ ਪ੍ਰਕਿਰਿਆ ਜਾਰੀ ਹੈ।