ਔਨਲਾਈਨ ਡੈਸਕ/ਲਿਵਿੰਗ ਇੰਡੀਆ ਨਿਊਜ਼:- ਡਾਇਰੈਕਟਰ ਜਨਰਲ ਸਿਵਲ ਏਵੀਏਸ਼ਨ ਦੇ ਆਦੇਸ਼ ਦੇ ਬਾਅਦ ਜ਼ਿਲ੍ਹਾ ਪੁਲਿਸ ਨੇ ਪਠਾਨਕੋਟ ਵਿੱਚ ਡਰੋਨ ਉਡਾਣ ‘ਤੇ ਮੁਕੰਮਲ ਪਾਬੰਦੀ ਲਗਾਈ ਹੈ। ਜਾਰੀ ਕੀਤੇ ਗਏ ਆਦੇਸ਼ ਅਨੁਸਾਰ ਡਰੋਨ ਅੰਤਰਰਾਸ਼ਟਰੀ ਸਰਹੱਦ ਦੇ 25 ਕਿਲੋਮੀਟਰ ਦੇ ਖੇਤਰ ‘ਚ ਉਡਾਣ ਨਹੀਂ ਭਰ ਸਕਣਗੇ, ਇਸ ਤੋਂ ਇਲਾਵਾ ਫੌਜ, ਹਵਾਈ ਸੈਨਾ ਸਮੇਤ ਹੋਰ ਰੱਖਿਆ ਖੇਤਰਾਂ ਦੇ 3 ਕਿਲੋਮੀਟਰ ਦੇ ਖੇਤਰ ਵਿਚ ਡਰੋਨ ਦੀ ਸਰਗਰਮੀ ਨਹੀਂ ਕੀਤੀ ਜਾਵੇਗੀ। ਇਸ ਦੇ ਨਾਲ ਹੀ ਮਿਲਟਰੀ ਹਸਪਤਾਲ ਦੇ 2 ਕਿਲੋਮੀਟਰ ਦੇ ਖੇਤਰ ‘ਚ ਡਰੋਨ ਉਡਾਣ ‘ਤੇ ਵੀ ਪਾਬੰਦੀ ਹੋਵੇਗੀ।
ਆਦੇਸ਼ ਦੀ ਪੁਸ਼ਟੀ ਕਰਦਿਆਂ ਐਸਪੀ ਆਪ੍ਰੇਸ਼ਨ ਹੇਮਪੁਸ਼ਪ ਨੇ ਕਿਹਾ ਕਿ, ਸਾਰੇ ਡਰੋਨ ਆਪ੍ਰੇਟਰਾਂ ਅਤੇ ਫੋਟੋਗ੍ਰਾਫ਼ਰਾਂ ਨੂੰ ਸਮਝਾਇਆ ਗਿਆ ਹੈ। ਨਾਲ ਹੀ ਦੱਸ ਦਈਏ ਨਿਯਮਾਂ ਦੇ ਅਨੁਸਾਰ ਅੰਤਰ ਰਾਸ਼ਟਰੀ ਸਰਹੱਦ, ਬੀਐਸਐਫ, ਆਰਮੀ, ਏਅਰਫੋਰਸ ਅਤੇ ਐਮਐਚ ਲਈ ਵੱਖ-ਵੱਖ ਦੂਰੀਆਂ ਦੀ ਰੇਂਜ ਨਿਰਧਾਰਤ ਕੀਤੀ ਗਈ ਹੈ, ਪਰ ਭਾਰਤ-ਪਾਕਿ ਸਰਹੱਦ ਨਾਲ ਘਿਰੇ ਫੌਜ, ਬੀਐਸਐਫ, ਹਵਾਈ ਸੈਨਾ ਅਤੇ ਪਠਾਨਕੋਟ ਦੇ ਆਲੇ-ਦੁਆਲੇ ਡਰੋਨ ਨਹੀਂ ਉਡਾਈ ਜਾਣੀ ਹੈ। ਅਜਿਹੀ ਸਥਿਤੀ ਵਿੱਚ, ਵਿਆਹ ਸਮੇਤ ਹੋਰ ਸਮਾਰੋਹਾਂ ਵਿੱਚ ਡਰੋਨ ਉਡਾਣ ਦੀ ਯੋਜਨਾ ਬਣਾ ਰਹੇ ਲੋਕਾਂ ਨੂੰ ਨਿਰਾਸ਼ ਹੋਣਾ ਪਏਗਾ।
ਪਠਾਨਕੋਟ ਦਾ ਬਮਿਆਲ ਪਿੰਡ, ਨਰੋਟ ਜੈਮਲ ਸਿੰਘ ਸਰਹੱਦ ਨਾਲ ਲੱਗਿਆ ਹੋਇਆ ਹੈ। ਉੱਥੋਂ, ਸ਼ਹਿਰ ਦੀ ਦੂਰੀ 20 ਤੋਂ 22 ਕਿਲੋਮੀਟਰ ਹੈ, ਇਸ ਲਈ ਇਹ ਸ਼ਹਿਰ ਵੀ 25 ਕਿਲੋਮੀਟਰ ਦੇ ਘੇਰੇ ਵਿੱਚ ਹੈ। ਇਸ ਤੋਂ ਇਲਾਵਾ ਏਅਰ ਫੋਰਸ ਸਟੇਸ਼ਨ ਸ਼ਹਿਰ ਦੇ ਨੇੜੇ ਹੈ, ਜਿਸ ਕਰਕੇ ਸ਼ਹਿਰ ‘ਚ ਬਹੁਤ ਸਾਰੀ ਪਾਬੰਦੀ ਲਗ ਗਈ। ਇਸ ਦੇ ਨਾਲ ਹੀ ਮਾਮੂਨ ਮਿਲਟਰੀ ਸਟੇਸ਼ਨ, ਐਮਐਚ ਅਤੇ ਮਾਧੋਪੁਰ ਵਿੱਚ ਬੀਐਸਐਫ ਨੂੰ ਵੀ ਵਿਚਾਰਿਆ ਜਾਣਾ ਹੈ, ਇਸ ਲਈ ਪਠਾਨਕੋਟ ਵਿੱਚ ਕਿਤੇ ਵੀ ਡਰੋਨ ਉਡਾਣ ਦੀ ਆਗਿਆ ਨਹੀਂ ਮਿਲੇਗੀ। ਐਸਪੀ ਨੇ ਕਿਹਾ ਕਿ, ਉਨ੍ਹਾਂ ਨੂੰ ਡੀਜੀਸੀਏ ਤੋਂ ਦਿਸ਼ਾ ਨਿਰਦੇਸ਼ ਪ੍ਰਾਪਤ ਹੋਏ ਸਨ, ਜਿਨ੍ਹਾਂ ਨੂੰ ਲਾਗੂ ਕੀਤਾ ਜਾ ਰਿਹਾ ਹੈ। ਲੋਕਾਂ ਨੂੰ ਦੱਸਿਆ ਜਾ ਰਿਹਾ ਹੈ, ਫਿਰ ਵੀ ਜੇ ਕੋਈ ਡਰੋਨ ਉਡਾਉਂਦਾ ਹੈ ਤਾਂ ਆਈਪੀਸੀ ਦੇ ਤਹਿਤ ਅਪਰਾਧਿਕ ਕੇਸ ਉਸ ‘ਤੇ ਦਰਜ ਕੀਤਾ ਜਾਵੇਗਾ।